අග්‍රාමාත්‍ය හරිනි අමරසූරිය මහත්මිය විසින් ගොනු කර ඇති අපහාස නඩුවකට අදාළව පිළිතුරු ගොනු කරන ලෙස සමගි ජන බලවේගය පක්ෂයේ ජාතික සංවිධායක තිස්ස අත්තනායක මහතා හා Asia Broadcasting Corporation (Pvt) Ltd ආයතනයට කොළඹ දිසා අධිකරණය අද (21) නියෝග කළා.
2024 අගෝස්තු 19 වැනිදා විත්තිකාර තිස්ස අත්තනායක මහතා මාවනැල්ලේදී පැවති සමඟි ජනබලවේග ජනාධිපතිවරණ ප්‍රචාරක රැස්වීමකදී ප්‍රකාශ කර ඇත්තේ ” මට නුවර ප්‍රදේශයේ ස්වාමීන් වහන්සේ නමක් කතා කරලා කිව්වා, අර JVP කාරයෝ ආණ්ඩුවක් ගත්තම නුවර පෙරහැර නවත්තන්න යනවයි කියලා. පාර්ලිමේන්තුවේ ඉන්න හරිනි අමරසූරිය මහත්මිය තමයි එහෙම කිව්වේ කියලා.” ලෙසයි.
මෙම ප්‍රකාශය සීමාසහිත ඒෂියා බ්‍රෝඩ්කාස්ටින් කෝපරේෂන් පෞද්ගලික සමාගමට අයත් හිරු ටීවී ආයතනයෙහි 2024.08.19 වන දින රාත්‍රී 6.55 ප්‍රවෘත්ති විකාශයෙන් සංශෝධනය කොට විකාශයට පත්කළ බවත් මීට අමතරව එම නාලිකාවට අයත් Youtube අන්තර්ජාල වෙබ් අඩවියේ එම කතාව පළකර ඇති බවත් මීට අදාළ නඩුවෙහි සදහන් වනවා.
එමගින් හරිනි අමරසූරිය මහත්මිය සමාජය ඉදිරියේ අපහසුවටත්, අවමානයටත්, අපකීර්තියටත් පත් කිරීමේ අරමුණින් අදාළ ප්‍රකාශය චේතනාන්විතව, ද්වේශ සහගතව සිදු කර ඇති බව දක්වමින් සමඟි ජන බලවේගය පක්ෂයේ පාර්ලිමේන්තු මන්ත්‍රී තිස්ස අත්තනායක මහතාට සහ හිරු මාධ්‍ය ජාලයෙන් මිලියන 100 බැගින් වෙන් වෙන්ව වන්දි ඉල්ලා මෙම නඩුව ගොනු කර තිබෙනවා.
මෙම නඩුව කොළඹ අතිරේක දිසා විනිසුරු මහේෂා ද සිල්වා ඉදිරියේ කැඳවූ අවස්ථාවේදී තිස්ස අත්තනායක මහතා වෙනුවෙන් පෙනී සිටි නීතීඥවරයා පිළිතුරු ගොනු කිරීමට අමතර කාලයක් ඉල්ලා සිටියා.
ඒ අනුව, විත්තිකරුවන්ට 2025 ජූනි 03 වැනි දිනට පෙර පැමිණිල්ලට පිළිතුරු ගොනු කරන ලෙසට නියම කෙරුණා.
අග්‍රාමාත්‍යවරිය වෙනුවෙන් නීතීඥ ශානිකා සිල්වා පෙනී සිටි අතර, තිස්ස අත්තනායක මහතා වෙනුවෙන් නීතිඥ සචින්ත රුද්‍රිගු මහතාගේ උපදෙස් මත නීතිඥ කස්සල කැමර් මහතා පෙනී සිටියා.
