තමා සිය නිවසේ රැඳී සිටින බවත් හැකිනම් සිය නිවස අසලට පැමිණෙන ලෙසත් හිටපු පාර්ලිමේන්තු මන්ත්‍රීනී හිරුණිකා ප්‍රේමචන්ද්‍ර මහත්මිය විසින් ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී මධුර විතානගේ මහතාට අභියෝග කර සිටිනවා.
ඒ අද දින ඇතුළුකෝට්ටේ පිහිටි සමගි ජන බලවේගයේ ප්‍රධාන කාර්‍යාලයට එල්ල වූ කුණු බිත්තර ප්‍රහාරයක් සම්බන්ධයෙන් අදහස් දක්වමින්.
මධුර විතානගේ මහතා ඇතුළු 100ක පමණ පිරිසක් පැමිණ ඇත්තේ තමා ජනාධිපතිවරයාගේ නිවස ඉදිරිපිට සිදුකළ විරෝධතාවයට එරෙහිව විරෝධය පෑමට බවත් ආරක්ෂක නිලධාරීන්වත් නොමැති තමාගේ නිවසට පැමිණියහොත් මධුර විතානගේ මහතාට සාකච්ඡා කළ යුතු දේ සාකච්ඡා කළ හැකි බවත් ඇය පවසනවා.
මෙහිදී වැඩිදුරටත් අදහස් දැක්වූ හිරුණිකා ප්‍රේමචන්ද්‍ර මහත්මිය,
“දැන් දවසින් දවස අමාත්‍යවරුනුත් මාරු කරන එකේ මධුර විතානගේ මහතාට හොඳ අවස්ථාවක් ලැබිලා තියෙනවා ඊළඟ ඇමති ධූරයකට හොඳ අවස්ථාවක් හදා ගන්න. එතුමා ඉස්සර කෝට්ටේ නගර සභාව නියෝජනය කරද්දි ජනතාව හිතුවේ උගත් බුද්ධුමත් මහත්මයෙක් කියලා. වියත් මගෙන් තමයි එතුමා ආවේ. ඒ වගේ චරිතකෙන් මේවා බලාපොරොත්තු උනේ.
මධුර අයියේ, ඔයා දුමින්ද සිල්වා නෙවෙයි, රෝහිත අබේගුණවර්ධන නෙවෙයි. තිස්ස කුට්ටිලා වගේ විහිලුවට ලක්වෙන බත් බැලයෙක් වෙන්න එපා ඔයා ලෝයර් කෙනෙක්. අපි හොඳ යාලුවෝ. ඔයා කරපු දේ ඔයාට සුදුසු දෙයක් නෙවෙයි. ඔයාට මාත් එක්ක මූණට මූණ මාත් එක්ක කතා කරන්න පුළුවන්. ඔය තත්ත්වෙට වැටෙන්න එපා.”
