අග්‍රාමාත්‍ය රනිල් වික්‍රමසිංහ මහතාට එරෙහිව කොළඹ 5 වන පටුමගේ පිහිටි ඔහුගේ නිවස ඉදිරිපිටදී ඊයේ (22) පැවති විරෝධතාවයකදී ලබාගත් ඡායාරූප කිහිපයක් මේ වන විට සමාජ මාධ්‍යවල සංසරණය වෙමින් පවතිනවා.
එම විරෝධතාවයේදී පොලීසිය අතර ගැටෙන හිරුණිකා ප්‍රේමචන්ද්‍ර මහත්මියගේ පියයුරු නිරාවරණය වී පෙනෙන අවස්ථාවක ඡායාරූප යොදාගනිමින් විවිධ අසභ්‍ය දෑ නිර්මාණය කෙරෙමින් ඇයව සමාජ මාධ්‍ය තුළ දැඩි අපහාසයට ලක්කර තිබෙනවා.
මෙම ඡායාරූප කිහිපය අන්තර්ජාලය තුළ ප්‍රචාරය කිරීමට එක්තරා මාධ්‍ය නාලිකාවක ප්‍රධානියෙක් දැඩි කැපවීමෙන් කටයුතු කර ඇති බවට News19 වෙත වාර්තා වුණා.
මේ පිළිබදව සිය ෆේස්බුක් පිටුවේ අදහස් දක්වමින් හිරුණිකා ප්‍රේමචන්ද්‍ර මහත්මිය එම ඡායාරූපය හුවමාරු කරගනිමින් මේ වන විට එය උණුසුම් මාතෘකාවක් කරගෙන තිබෙන සියලු දෙනාට අපූරු පිළිතුරක් ලබාදී තිබෙනවා.
එම පිළිතුර පහතින්,
” මම මගේ පියයුරු ගැන ආඩම්බර වෙමි. මම සුන්දර දරුවන් තිදෙනෙකුට කිරිදුන්නෙමි. මම ඔවුන්ව පෝෂණය කළෙමි, ඔවුන්ව පහසුවෙන් තැබූයෙමි, ඔවුන් වෙනුවෙන් මාගේ ශරීරයම කැප කළෙමි.
(පොලිසීය සමග ඇතිවූ කලබලයේදී) මගේ නිරාවරිත පියයුරු වලින් විනෝද වන්නවුන් සියලු දෙනාම පාහේ ළදරුවන් ලෙස තමන්ගේ මවගේ තනපුඩු වියැලී යනතුරු උරා බොන්නට ඇතැයි මට නිසැකය.
ඔබ මාගේ පියයුරු ගැන කතා කොට, ඒවාට විසුළු කර, සිනා සී, මීම්ස් සදා අවසන් වූ විටෙක ඔබේ දැනගැනීමට ලියාතබමි.
තවත් සිවිල් වැසියෙක් පෝලිමකදී මියගොස් තිබේ. “
