කොරෝනා ආසාදිතයින්ට නිවසේදීම ප්‍රතිකාර කිරීමේ වැඩපිළිවෙලක් ගම්පහ දිස්ත්‍රික්කයේ ආරම්භ කොට ඇති බව දිස්ත්‍රික් සෞඛ්‍ය සේවා අධ්‍යක්ෂ කාර්යාලය සදහන් කරනවා.
කෙසේ නමුත් මෙසේ නිවෙස් ප්‍රතිකාර සඳහා අවසර ලැබෙන්නේ වෛරසය ආසාදිත බවට තහවුරු වුවත් රෝග ලක්ෂණ නොපෙන්වන සහ නිදන්ගත රෝගවලින් නොපෙලෙන රෝගීන් පමණක් බවයි සෞඛ්‍ය සේවා අධ්‍යක්ෂ කාර්යාලය පවසන්නේ.
සියලුම ආසාදිතයින් ප්‍රතිකාර මධ්‍යස්ථාන වෙත යොමු කිරීම වෙනුවට, අවශ්‍ය වූවහොත් පමණක් ඔවුන්ව රෝහල්ගත කිරීමට සෞඛ්‍ය සේවා අධ්‍යක්ෂ ජනරාල්වරයා ලබාදුන් උපදෙස් මත මෙම වැඩපිළිවෙළ ක්‍රියාත්මක කොට ඇති බවයි දිස්ත්‍රික් සෞඛ්‍ය සේවා අධ්‍යක්ෂ විශේෂඥ වෛද්‍ය නලීන් ආරියරත්න මහතා පවසන්නේ.
ඒ අනුව, රෝග ලක්ෂණ නොපෙන්වන අවුරුදු 5 ත් 60 ත් අතර වයසේ පසුවන කොරෝනා ආසාදිතයින් හට නිවැසියන්ගේ කැමැත්ත මත නිවෙස් ප්‍රතිකාර ලබාගත හැකිවනවා.
මොවුන් සම්බන්ධයෙන් වෛද්‍යවරුන් විසින් දුරකථනයෙන් විමසා බලනු ඇති බවත් හදිසි රෝග තත්ත්වයකදී ක්ෂණිකව කොවිඩ් ඇමතුම් මධ්‍යස්ථානය ඇමතීමට දුරකථන අංකයල් ලබාදෙනු ඇති බවත් දිස්ත්‍රික් සෞඛ්‍ය සේවා අධ්‍යක්ෂවරයා පවසනවා.
