2011 ලෝක කුසලාන තරගයේ පාවා දීමක් සිදුවූ බවට තමන් සිදුකළ ප්‍රකාශය සම්බන්ධයෙන් සිදුකළ පරීක්ෂණය පිළිබඳව තමන් සෑහිමට පත් නොවන බව කෘෂිකර්ම අමාත්‍ය මහින්දානන්ද අලුත්ගමගේ පවසනවා.
ඒ, හිටපු ක්‍රීඩා අමාත්‍ය මහින්දානන්ද අලුත්ගමගේ විසින් 2011 ලෝක කුසලාන අවසන් මහ තරගය පාවාදීමක් සිදුවූ බවට සිදුකළ ප්‍රකාශයට අදාලව නිසි සාක්ෂි නොමැති බව පවසමින් එම පරීක්ෂණ අවසන් කිරීමට නීතිපතිවරයා පසුගියදා තීරණය කරනු ලැබීම සම්බන්ධයෙන් මන්ත්‍රී මුජුබර් රහුමාන් විසින් අද (05) දින පාර්ලිමේන්තුවේදී නැගු වාචික ප්‍රශ්නයකට පිළිතුරු දෙමින්.
අපරාධ පරීක්ෂණ දෙපාර්තමේන්තුව විසින් එම පරීක්ෂණයේදී ශ්‍රී ලංකා ක්‍රිකට් ආයතයේ සභාපති ඩි.එස්. ද සිල්වා, ලේකම් නිශාන්ත රණතුංග සහ කණ්ඩායමේ කළමනාකරු සුරාජ් දන්දෙණිය ගෙන් ප්‍රකාශ සටහන් කර ගැනීමක් සිදු නොකළ බවයි අමාත්‍යවරයා පවසන්නේ.
එමෙන්ම, තමා සංගක්කාර, මහේල, අරවින්ද මහත්වරුන්ව ගෙනවිත් ප්‍රශ්න කරන්නැයි ප්‍රකාශ නොකළ බවත් තරග පාවාදීමට ක්‍රීඩකයින් සම්බන්ධ බවට ප්‍රකාශ නොකළ බවත් ඔහු අවධාරණය කර සිටිනවා.
මෙහිදී වැඩිදුරටත් අදහස් දැක්වූ අමාත්‍යවරයා,
“මොකද මේ ගැන අහන්න ඕන අය ඒ අයයි. එහෙම නැතුව ක්‍රීඩකයින් ගෙන් ප්‍රශ්න කරන්න කියලා මම කොතනකවත් කිව්වේ නැහැ. ඔය ගැන කිව්වා කියලා ගිය මහ මැතිවරණයෙන් මම මහනුවර දිස්ත්‍රික්කයේ දෙවැනි තැනට ආවේ. මොකද මට විරුද්ධව කැම්පේන් එකක් ගියා මේ ගැන කතා කළා කියලා මට ජන්දය දෙන්න එපා කියලා.
අනිත් කරුණ තමයි මම අදටත් ඔය මැච් ෆික්සින් කියන එක වෙනවා.”
