කළ යුතුව තිබුණේ අපද්‍රව්‍ය භාවිතයෙන් පොහොර සාදන යන්ත්‍රයක් ගෙන්වීම විනා චීනයෙන් අසූචි ආනයනය කිරීම නොවන බව ඩවලව බෞද්ධ මධ්‍යස්ථානාධිපති පූජ්‍ය සෙවනගල සෝරත හිමියෝ පවසනවා.
ඒ, පසුගියදා ඇඹිලිපිටිය මහවැලි වළව කලාපයේ ගොවි බිම්වලට මහ කන්නය සඳහා ජලය නිකුත් කරන අවස්ථාවට එක්වෙමින්.
අග්‍රාමාත්‍ය මහින්ද රාජපක්ෂ මහතාට හෝ ජනාධිපති ගෝඨාභය රාජපක්ෂ මහතාට පමණක් නොව අතීතයේ හයවන පරාක්‍රමබාහු රජතුමාටත් චීන අධිරාජ්‍යයා උදව් කර ඇති බවයි උන්වහන්සේ පවසන්නේ.
“හයවන පරාක්‍රමබාහු රජතුමාගේ නැවක් කොල්ල කනවා. රජතුමා පල්ල වරාය අල්ලලා සොලී රට මකුළුව ගම ඇතුළු ගම් හතරක් අල්ලලා එහෙන් බදු ගත්තා අපේ රටට. ඒ වගේ රජෙක් අද හිටිය නං ගූත් චීනෙ සල්ලිත් චීනෙ. අර එව්වා නේ ගූ නැවක්, පළවෙනි වතාවෙත් චෙක්කරත් ගූ, දෙවෙනි වතාවෙ චෙක්කරත් ගූ, තුන්වෙනි වතාවෙ චෙක්කරත් ගූ,” යැයි උන්වහන්සේ පවසනවා.
මේ අතර, චීන බාල පොහොර නැව ජීව විද්‍යාත්මක බෝම්බයක් ආකාරයට තමන් දකින බව ජාතික අවදි සභාවේ සභාපති විශ්‍රාමික මේජර් ජෙනරාල් තිලක් උභයවර්ධන මහතා පවසනවා.
සුලු කොටසකගේ වාසිය තකා අතයට ගනුදෙනුවක් එහිදී සිදුව ඇති බවයි ඔහු පෙන්වා දෙන්නේ.
” එතකොට මේවා ගැන හොයන්න මේ ආරක්ෂක අමාත්‍යාංශයක් තියෙනවා. හිටපු ගමන් නැව මතුවෙනවා. දකුණු මුහුදේ ඒ නැවේ නම වෙනස් වෙනවා ආයිත් සැරයක් පරණ නමට යනවා. මොකක්ද මේ කරන්න යන සෙල්ලම කියලා” යැයි ඔහු පවසනවා.
තොග අනුමැතියක් ලබා නොදුන් නැවක් භාර ගැනීමේ හැකියාවක් නොමැති බවත් එය භාර ගැනීමට ශාක ආරක්ෂණ පනතේ විධි විධාන නොමැති බවත් කෘෂිකර්ම දෙපාර්තමේන්තුවේ අධ්‍යක්ෂක ජනරාල් ආචාර්ය අජන්ත ද සිල්වා මහතා අවධාරණය කර සිටින නමුත් චීන පොහොර තොගය සහිත හිපෝ ස්ප්‍රිට් නෞකාව තවමත් ශ්‍රී ලංකා මුහුදේ රැඳී සිටියි.
