තමාව ඝාතනය කර රටේ හදිසි නීතිය පැනවීමට සැලසුම් කරන ලද්දේ හිටපු හමුදා ප්‍රධානී ජෙනරාල් කමාර් ජාවෙඩ් බජ්වා බව පාකිස්තානයේ හිටපු අගමැති සහ පාකිස්තාන ටෙහ්රීක්-ඊ-ඉන්සාෆ් (PTI) පක්ෂයේ ප්‍රධානී ඉම්රාන් ඛාන් චෝදනා කරයි.
ඩෝන් පුවත්පත වාර්තා කර ඇති ආකාරයට, වසිරාබාද්හිදී තමා ඝාතනය කිරීම සඳහා එල්ල කළ ප්‍රහාරය සම්බන්ධයෙන් තවත් හෙළිදරව් කිරීම් ඉදිරියේදී සිදුකරන බව ඉම්රාන් ඛාන් පවසා තිබේ.
හිටපු හමුදාපතිවරයා විශ්‍රාම ගොස් ඇති බැවින් ඔහුට එරෙහිව චෝදනා එල්ල කිරීම නවත්වන්නැයි බොහෝ දෙනා තමාට පවසන බවද හිටපු අග්‍රාමාත්‍යවරයා පවසා ඇත.
නමුත් ඔහුට හිටපු හමුදාපතිවරයා කළ අපරාධ වසන් කිරීමට නොහැකි බවද හෙතෙම පෙන්වාදී තිබේ.
මේ අතර තමාගේ සෞඛ්‍ය තත්ත්වය යහපත් වූ පසු රට පුරා සංචාරය කරන බවද හිටපු අගමැතිවරයා මාධ්‍යවේදීන් හමුවේ පවසා ඇත.
පාකිස්තානයේ හිටපු අගමැති ඉම්රාන් ඛාන් ඝාතන තැත සම්බන්ධයෙන් විමර්ශනය කරන පාකිස්තාන ඒකාබද්ධ විමර්ශන කණ්ඩායම, අදාළ වෙඩි තැබීම විවිධ ස්ථාන තුනකින් සිදු කර ඇති බව සොයා ගත් බව ඩෝන් වාර්තා කරයි.
