ඉන්ධන මිල ඉහළ දැමීමට සාපේක්ෂව බස් ගාස්තු ඇතුළුව අනෙකුත් අත්‍යාවශ්‍ය සේවාවල මිල ගණන් වෙනස් කිරීම සදහා ද කැබිනට් අනුමැතිය හිමිවූ බව විදුලිබල හා බලශක්ති අමාත්‍ය කංචන විජේසේකර මහතා පවසයි.
සිය ට්විටර් ගිණුමේ සටහනක් තබමින් ඔහු පෙන්වා දෙන්නේ, අධ්‍යයන පොදු සහතික පත්‍ර සාමාන්‍ය පෙළ විභාගයට පෙනී සිටින අපේක්ෂකයින්ට බාධා නොවන ආකාරයෙන් ප්‍රවාහන ගාස්තු සංශෝධනය කිරීම සඳහා පියවර ගන්නා ලෙස අදාළ අංශ වෙතින් ඉල්ලීමක් කරන බවයි.
ඒ අනුව අවම බස් ගාස්තුව රුපියල් 40 දක්වා ඉහළ දැමීමට බස් සංගම් සාකච්ඡා කරමින් සිටිනවා.
කෙසේවෙතත් මෙම මිල ගණන් ඉහළ දැමීම අපොස සාමාන්‍ය පෙළ විභාගයෙන් අනතුරුව සිදුකිරීමට එම සංගම් අවධානය යොමුකර තිබෙනවා.
එමෙන්ම අධික ලෙස ඉන්ධන මිල ඉහළ දැමීම හේතුවෙන් අනෙකුත් භාණ්ඩ හා සේවා මිලද ඉදිරි දින කිහිපයේදී ජනතාවට දරාගත නොහැකි ලෙස ඉහළ යනු ඇති බවයි ආර්ථික විශ්ලේෂකයින් පෙන්වා දෙන්නේ.
