දැවැන්ත ආර්ථික අර්බුදයකට මුහුණ දෙන ලතින් අමෙරිකානු ආර්ජන්ටිනාවේ වාර්ෂික උද්ධමනය ජුනි මාසයේදී සියයට 115 ඉක්මවා තිබෙනවා.
එබැවින් ආර්ජන්ටිනා වැසියන් සිය වියදම් පාලනය කිරීම සඳහා අත්‍යවශ්‍ය මූලික ආහාර ද්‍රව්‍ය පමණක් මිලදී ගැනීමට පෙළඹී ඇති බව වාර්තා වෙනවා.
එහිදී ඔවුන් මිල අඩු ආහාර ද්‍රව්‍ය සෙවීමට යොමු වී ඇති බවද සඳහන්.
ආර්ථික විශ්ලේෂකයන් පෙන්වා දෙන්නේ, දැන් පවතින ප්‍රවණතාව ඉදිරියටත් ක්‍රියාත්මක වුවහොත් වසර අවසානය වනවිට ආර්ජන්ටිනාවේ උද්ධමනය සියයට 140 ඉක්මවා යනු ඇති බවයි.
පසුගිය වසර පුරාම පැවති ආර්ජන්ටිනාවේ ආර්ථික අර්බුදය හේතුවෙන් එරට ජනගහනයෙන් සියයට 40ක් දැන් දරිද්‍රතාවෙන් පෙළෙන ජන කොටසක් බවට පත්වී තිබෙනවා.
මේ අතර, ආර්ජන්ටිනාව ජාත්‍යන්තර මූල්‍ය අරමුදලෙන් ගිවිසගෙන ඇති ඩොලර් බිලියන 44ක ණය මුදල පිළිබඳ නැවත ඇගයීමේ සාකච්ඡාවක් මේ සතියේ පැවැත්වන බවට විදෙස් මාධ්‍ය පවසනවා.
රට තුළ උද්ධමනය ඉහළ යාමත්, ‘පෙසෝ’ විනිමය අවප්‍රමාණය වීමත්, දරුණු නියඟයෙන් කෘෂි අපනයන පහළ වැටීමත්, විදේශ සංචිතය පිරිහීමත් නිසා IMF ණය මුදල ආපසු ගෙවීමේ ක්‍රියාවලිය නැවත සැකසිය යුතු බවට ආර්ජන්ටිනාව ඉල්ලීමක් කර තිබෙනවා.
