තමන්ට තර්ජන ඇති බවට මාධ්‍යවේදී චමුදිත සමරවික්‍රම මහතා කළ ප්‍රකාශය ගැන ශ්‍රී ලංකා තරුණ ජනමාධ්‍යවේදීන්ගේ සංගමය කළ පැමිණිල්ලට අදාලව විමර්ශන ආරම්භ කර ඇතැයි පොලිසිය කියයි.
ඒ අනුව අද (08) මෙම පැමිණිල්ලට අදාලව ශ්‍රී ලංකා තරුණ ජනමාධ්‍යවේදීන්ගේ සංගමයේ නියෝජිතයෙකුගෙන් පොලිසිය ප්‍රකාශ සටහන් කර ගත්තේය.
මෙම පැමිණිල්ල පොලිස්පතිවරයා විසින් බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පතිවරයාට යොමු කර ඇති බවත්, ඔහු විසින් එය බස්නාහිර උතුර නියෝජ්‍ය පොලිස්පතිටත්, ගම්පහ ජ්‍යෙෂ්ඨ පොලිස් අධිකාරීටත් යොමු කර ඇති බවත් පොලිසිය පවසයි.
ඒ අනුව ගම්පහ මූලස්ථාන පොලිස් පරීක්ෂකගේ උපදෙස් පරිදි ගම්පහ මූලස්ථාන පොලිසියේ අපරාධ විමර්ශව අංශයේ ස්ථානාධිපති ධුරය දරන ප්‍රධාන පොලිස් පරීක්ෂකවරයා විසින් ශ්‍රී ලංකා තරුණ ජනමාධ්‍යවේදීන්ගේ සංගමයේ නියෝජිතයෙකුගෙන් ප්‍රකාශය සටහන් කරගනු ලැබීය.
චමුදිත මහතා තමාට තර්ජන ඇතැයි කළ ප්‍රකාශය සත්‍යයක් නම් එව බරපතල තත්ත්වයක් බැවින් මේ සම්බන්ධයෙන් විමර්ශනයක් කරන ලෙසත්, එවැනි තර්ජනයක් ඇත්නම් ඔහුගේ ආරක්ෂාව සහතික කරන ලෙසත් සංගමය ඉල්ලා සිටියේය.
මාධ්‍යවේදියකුට පමණක් නොව ඕනෑම පුරවැසියකුට තර්ජනවක් ඇතැයි තොරතුරක් ලදහොත් පොලිසිය දැනුම්වත් කිරීම යුතුමක් බවද, ඒ සම්බන්ධයෙන් විමර්ශනය කිරීම පොලිසියේ වගකීමක් බව ද ශ්‍රී ලංකා තරුණ ජනමාධ්‍යවේදීන්ගේ සංගමය පොලිසියට ප්‍රකාශ කර තිබේ.
