ගෝඨාභය රාජපක්ෂ ජනාතිපතිවරයාගේ, මහින්ද රාජපක්ෂ අග්‍රාමාත්‍යවරයාගේ, බැසිල් රාජපක්ෂ මුදල් අමාත්‍යවරයාගේ ඥාති සොයුරියක් විශාල ධනස්කන්ධයක් හෙළිදරව් නොකොට සඟවාගෙන ඇති බව පැන්ඩෝරා පත්‍රිකා හරහා හෙළිදරව් වී ඇති බව ජනතා විමුක්ති පෙරමුණේ නායක අනුර කුමාර දිසානායක මහතා පවසනවා.
ඒ, ඊයේ (04) දින මාධ්‍ය අමතමින්.
පැන්ඩෝරා පත්‍රිකා හරහා හෙළිවූ සියලුම පාකිස්ථානු වැසියන්ට එරෙහිව නීතිය ක්‍රියාත්මක කරන බව පාකිස්ථාන අග්‍රාමාත්‍යවරයා පැවසුවද මෙරට පාලකයින් ඒ සම්බන්ධයෙන් නිහඬව සිටින බවයි අනුර කුමාර දිසානායක මහතා පවසන්නේ.
“ජනාතිපතිවරයා, අග්‍රාමාත්‍යවරයා හො මුදල් අමාත්‍යවරයා මේ සම්බන්ධව මුකුත් කියන්නෙ නෑ. මොකද, මේ ඔවුන්ගේ ඥාතීන්. මේ තිරු නඩේෂන් කියන්නේ කවුද? මම මීට පෙරත් සඳහන් කරලා තියෙනවා, බැසිල් රාජපක්ෂට අයත් යැයි නඩු තියෙන මල්වානේ නිවසේ ඔප්පුව තිබුණේ තිරු නඩේෂන්ගේ නමට.
2015 ජනවාරි මාසයේ 8වනදා පාන්දර 3ට විතර රනිල් වික්‍රමසිංහ යනවා මහින්ද රාජපක්ෂගේ නිවසට. යන්නේ තිරු නඩේෂන් එක්ක, බලය හුවමාරුව පිළිබඳ සාකච්ඡාවට. තිරු නඩේෂන් හෝ නිරූපමා රාජපක්ෂ මේ චෞර වළල්ලෙන් එළියෙ ඉන්න අය නෙවෙයි. මේ ඒ වළල්ලේම අයගේම ධනයද කියන එක ගැන අපිට ඉතාම සාධාරණ සැකයක් තියෙනවා.
මේ පළමු අවස්ථාව නෙවෙයි. ඉමාඩ් සුබේරි කියන සීඅයිඒ නියෝජිතයා ඇමරිකා එක්සත් ජනපදය අවුරුදු 12කට හිරේ දැම්මා. එතනදී වාර්තා උනා ඔහුට 2013-14 වසර වලදී එවකට මහබැංකු අධිපති අජිත් නිවාඩ් කබ්රාල් කැබිනට් අනුමැතියකින්ද තොරව ඩොලර් මිලියන 6.5ක් ගෙවූ බව.
මීට කලින් ඔබට මතක ඇති, ඇමරිකාවේ නිව්යෝක් ටයිම්ස් පුවත්පතේ විශේෂයෙන්ම මහින්ද රාජපක්ෂ මහත්තයා ඉලක්ක කරගෙන ඩොලර් මිලියන 7කට ආසන්න මුදලක් ඔහුගේ මැතිවරණ ව්‍යාපාරයට චීන සමාගමක් විසින් ලබා දුන් බවට පුවතක් පලකරාම අග්‍රාමාත්‍යවරයා කිව්වා ඒ පුවත්පතට නඩුදානවා කියලා. අහන්න කවදාහරි හම්බුනාම නඩුව කොහොමද කියලා.
ලෝකෙ දූෂිත ගණුදෙනු එලියට එද්දි ලංකාවේ නම් එලියට එන එක සාමාන්‍ය වෙලා. ඔබ හිතන්න මේක දූෂිත රාජ්‍යයක් නෙවෙයි ද?” යැයි ඔහු පවසනවා.
