කොළඹ බේරේ වැව පිරිසිදු කර අලංකාර කිරීමේ ව්‍යාපෘතියක් නොමිලේ කරදීමට ජපන් සමාගමක් රජයට එකඟතාව පළ කර තිබෙනවා.
දේශගුණික විපර්යාස පිළිබඳ ජනාධිපති ජ්‍යෙෂ්ඨ උපදේශක රුවන් විජයවර්ධන මහතා සහ එම සමාගමේ නියෝජිතයන් අතර ඉකුත් සතියේ ජනාධිපති ලේකම් කාර්යාලයේ පැවැති සාකච්ඡාවකින් පසු අදාළ සමාගම මෙම එකඟතාව පළකර ඇති බවයි වාර්තා වන්නේ.
අදාළ ව්‍යාපෘතිය ආරම්භ කළ දින සිට මාස 6ක් ඇතුළත වැඩ අවසන් කිරීමට නියමිතයි.
ව්‍යාපෘතිය සඳහා වැයවන මුළු මුදල ඩොලර් මිලියන 3ක් වන අතර එය අදාළ සමාගමේ ප්‍රදානයක් ලෙස මෙරටට ලැබීමට නියමිතයි.
මේ වන විට බේරේ වැව අපවිත්‍ර වී දුඟද හමන තත්ත්වයට පත්ව ඇති බැවින් එය පිරිසිදු කර දෙන ලෙස ගංගාරාම විහාරාධිකාරී ආචාර්ය කිරින්දේ අස්සජි හිමියන් ජනාධිපති රනිල් වික්‍රමසිංහ මහතාගෙන් කළ ඉල්ලීමකට අනුව මෙම ව්‍යාපෘතිය ආරම්භ කරනු ඇති.
පෙබරවාරි මස මුල් සතිය වන විට අදාළ ගිවිසුම් අත්සන් කිරීමට නියමිත බවයි වැඩිදුරටත් වාර්තා වන්නේ.
පසුගිය මැයි 09 වනදා ගාලු මෝදර ඇතිවූ සිදුවීමත් සමඟ කොළඹ බේරේ වැව ජාත්‍යන්තරයේද ජනප්‍රියත්වට පත්වූවා.
ඒ ගාලුමෝදර අරගලකරුවන් හට පහරදුන් ශ්‍රී ලංකා පොදුජන පෙරමුණේ ආධාරකරුන් පිරිසක් බේරේ වැවට තල්ලු කර ඔවුන්ට එම ස්ථානයේ දිය නෑමට සැලැස්වූ ඡායාරූප හා වීඩියෝ දර්ශන හේතුවෙන්.
