බෝතල් කිහිපයක අපවිත්‍ර ද්‍රව්‍ය තිබූ බවට වාර්තා වීමෙන් පසුව ජපානය මෝඩර්නාගේ COVID-19 එන්නත මාත්‍රා මිලියන 1.63 ක භාවිතය අත්හිටුවා ඇති බව එරට සෞඛ්‍ය අමාත්‍යාංශය පවසන බව Al Jazeera පුවත් සේවය වාර්තා කරනවා.
ජපානයේ මොඩර්නා එන්නත අලෙවිය සහ බෙදා හැරීම භාරව සිටින ටකේඩා ඖෂධ සමාගම අද (26) කියා සිටියේ විවෘත නොකළ බෝතල් තුළ යම් ආගන්තුක ද්‍රව්‍ක්ය හමු වී ඇති බවට එන්නත් මධ්‍යස්ථාන කිහිපයකින් වාර්තා ලැබී ඇති බවයි.
ටෝකියෝ ද ඇතුළුව මධ්‍යම ජපානයේ එන්නත් කරන ස්ථාන අටක විවෘත නොකළ බෝතල් 39 ක අපවිත්‍ර ද්‍රව්‍ය දක්නට ලැබුණු බව වාර්තා වේ.
කෙසේ වෙතත්, මේ හරහා එන්නතේ ආරක්‍ෂාව හෝ කාර්‍යක්‍ෂමතාව පිළිබඳව ගැටලු හඳුනාගෙන නොමැති බවත් එන්නත අත්හිටුවීමට ගත් තීරණය පූර්වාරක්‍ෂකයක් පමණක් බවත් ජපාන රජය සහ මොඩර්නා සමාගම යන පාර්ශව දෙකම පවසන බව රොයිටර් පුවත් සේවය පවසනවා. නමුත්, මෙම පියවර හේතුවෙන් අද දින සැලසුම් කර තිබූ පරිදි සිය සේවකයට එන්නත් ලබාදීම අවලංගු කිරීමට ජපන් සමාගම් කිහිපයක්ම පෙලඹුණි.
සිය COVID-19 එන්නත් කුප්පි වල අංශුමාත්‍ර ද්‍රව්‍ය දක්නට ලැබෙන බවට දැනගන්නට ලැබී ඇති බව තහවුරු කරන බවත් සමාගම විසින් වාර්තා විමර්ශනය කරන අතර මේ සම්බන්ධයෙන් සිය හවුල්කරු ටකෙඩා සහ අනෙකුත් පාර්ශව සමඟ කඩිනමින් වැඩකටයුතු සිදුකිරීමට කැපවී සිටින බවත් මොඩර්නා සමාගම විසින් නිකුත් කළ නිවේදනයක දැක්වේ.
ස්පාඥ්ඥයේ පිහිටි එක් නිෂ්පාදන ස්ථානයක ගැටලුවක් හේතුවෙන් මෙය සිදුවී තිබිය හැකි බව මෝඩර්නා සමාගම වැඩිදුරටත් පවසයි.
