රටේ ආර්ථික අර්බුදය හේතුවෙන් වාහන ආනයනයට සීමා පනවා පාර්ලිමේන්තු මන්ත්‍රීවරුන්ට තීරු බදු රහිත වාහන බලපත් ලබාදීම අත්හිටවු බව කියනු ලැබු තත්වය උඩ, තීරු බදු රහිත බලපත්‍රය යටතේ 2023 වර්ෂයේදි පාර්ලිමේන්තු මන්ත්‍රිවරුන් 10ක් වාහන ආනයනය කර ඇති බවට තොරතුරු අනාවරණය වනවා.
ඒ බව අනාවරණය වන්නේ ශ්‍රි ලංකා රේගුව පාර්ලිමේන්තුවට ඉදිරිපත් කර ඇති 2023 වර්ෂයට අදාළ කාර්යසාධන වාර්තාවේ ඇතුළත් තොරතුරු මඟින්ය.
එම තොරතුරු අනුව හිටපු ජනපති රනිල් වික්‍රමසිංහ මහතාගෙන් තීරු බදු රහිත වාහන බලපත් යටතේ වාහන ගෙන්විම සඳහා පසුගිය පාර්ලිමේන්තුවේ මන්ත්‍රීවරු 10 දෙනෙකුට අවසර හිමිව තිබෙනවා.
තීරු බදු රහිත වාහන බලපත් සඳහා අවසර ලබාදෙන ලෙස හිටපු ජනාධිපති රනිල් වික්‍රමසිහංගෙන් ආණ්ඩු පක්ෂයේ හා විපක්ෂයේ මන්ත්‍රීවරුන් දිගින් දිගමට ඉල්ලිම් කළ අතර හිටපු ජනාධිපතිවරයාගෙන් විපක්ෂයේ මන්ත්‍රිවරයෙකු වාහන බලපත් සඳහා අවසර ලබාදෙන ලෙස කරන ඉල්ලිමක විඩියෝ දර්ශනද සමාජ මාධ්‍ය ඔස්සේ ප්‍රචාරය වුණා.
එම වාර්තාවට අනුව රාජ්‍ය පරිපාලන චක්‍රලේක යටතේ නිකුත් කරන ලද වාහන බලපත්‍ර 5144ක්,සාමාන්‍ය වාහන බලපත්‍ර 194ක්,විදේශ කටයුතු අමාත්‍යංශය යටතේ වාහන බලපත්‍ර 1ක්, පළාත් සභා යටතේ වාහන බලපත්‍ර 1397 ,බදු නිදහස් කිරිම් යටතේ එම වර්ශයේ දී ශ්‍රි ලංකාවට ආනයනය කර තිබෙනවා.
ඊට අමතරව 2023 වර්ෂයේදි කිරිපිටි සම්බන්ධයෙන් අවස්ථා 613 කදී, උණ ලී සම්බන්ධයෙන් අවස්ථා 18කදී ,තිරිඟු පිටි සම්බන්ධයෙන් අවස්ථා 716දී ගෑස් හා තෙල් සම්බන්ධයෙන් අවස්ථා 770කදී බදු නිදහස් කිරිම් ලබා දි තිබෙන බව සඳහන්.
දුම්රිය දෙපාර්තමේන්තුවේ ව්‍යාපෘති සඳහා බදු නිදහස් කිරිම් 03ක්ද නාගරික සංවර්ධන අධිකාරියේ ව්‍යාපෘති සඳහා බදු නිදහස් කිරිම් 55ක්ද,මහාමාර්ග සහ මාර්ග සංවර්ධන අමාත්‍යංශයේ ව්‍යාපෘති සඳහා බදු නිදහස් කිරිම් 55ක්ද,ප්‍රවාහන හා සිවිල් සේවා ගුවන් අමාත්‍යංශයේ ව්‍යාපෘති සඳහා බදු නිදහස් කිරිම් 58ක්ද ,උමා ඔය ව්‍යාපෘතිය සඳහා බදු නිදහස් කිරිම් 20ක්ද ලබා දි තිබෙන බවයි පැවසෙන්නේ.
