අධිරණයට අපහාස කිරීම ඇතුළු චෝදනා දෙකක් හේතුවෙන් රක්ෂිත බන්ධනාගාරගත කල ප්‍රියංකා උදයංගනී සමරතුංග නමැති නීතීඥවරියට අභියාචනාධිකරණය විසින් මුදා හරින ලෙස නියෝග කර තිබෙනවා.
අභියාචනාධිකරණය විසින් බන්ධනාගාර නිළධාරීන්ට අද (31) මෙම නියෝගය සිදුකළා.
ශ්‍රී ලංකා නීතීඥ සංගමයේ සභාපති නීතීඥ රජීව අමරසූරිය මහතා විසින් ඉදිරිපත් කළ පෙත්සමක් විභාග කිරීමෙන් අනතුරුව අභියාචනාධිකරණය වැඩබලන සභාපති මොහොමඩ් ලෆාර් තාහීර් සහ ප්‍රියන්ත ප්‍රනාන්දු යන මහත්වරුන්ගෙන් සමන්විත විනිසුරු මඩුල්ලක් විසින් මෙම නියෝගය නිකුත් කරනු ලැබුවා.
නිදහස් වීමෙන් පසුව එම නීතිඥවරියට අප්‍රේල් මස 28 වනදා අභියාචනාධිකරණය හමුවේ පෙනී සිටිය යුතු බවටත් අධිකරණය විසින් නියම කළා.
පුත්තලම මහාධිකරණයේ විභාග වන නඩුවක සැකකරුවකුට ඇප ලබා ගැනීම සඳහා පසුගිය මාර්තු 07 වන දින අධිකරණය හමුවේ පෙනී සිටි ප්‍රියංකා උදයංගනී සමරතුංග නමැති නීතීඥවරිය අධිකරණ ශාලාවට ඇතුළු වීමේ දී අධිකරණයට හිස නමා ආචාර නොකිරීම මඟින් අධිරණයට අපහාස කිරීම ඇතුළු චෝදනා දෙකක් හේතුවෙන් රක්ෂිත බන්ධනාගාරගත කරණු ලැබුවා.
මහාධිකරණය හෝ මහාධිකරණ විනිශ්චයකාරවරිය සුදුසු පරිදි ගෞරවාන්විතව ඇමතීම චේතනාන්විතව නොකර හැරීම සහ මහාධිකරණයේ විවෘත අධිකරණ ශාලාවට ඇතුළු වීමේ දි අධිකරණයට හිස නමා ආචාර කර ගෞරව කිරීම චේතනාන්විතව නොකර හැරීම යන චෝදනා නීතීඥවරියට එරෙහිව එල්ල වී තිබුණා.
