මහර බන්ධනාගාරය තුළ උද්ගත වූ සිදුවීම කොරෝනා රෝගීන් වැඩිවීම නිසා ඇතිවූ තදබදය හේතුවෙන් නිර්මාණය වූවක් නොවන බවත්, ජනාධිපතිවරයාව ජාත්‍යන්තරව අපකීර්තියට පත් කිරීම සඳහා සංවිධානාත්මකව ඇති කළ කුමන්ත්‍රණයක් බව අමාත්‍ය විමල් වීරවංශ මහතා පැවසීය.
විරවංශ මහතා මේ ආකාරයෙන් අදහස් දැක්වුයේ නොවැම්බර් 30 වන දින පාර්ලිමේන්තුවේදීය.
හිරගෙදර ඇතිවුණු තත්වය මම පෞද්ගලිකව කරුණු සොයා බැලීමක් කළ නිසයි මම මේ නැඟී සිටියේ. මම කියන්න ඕනෙ මේක මේ ඇතිවී තිබෙන තදබදයක ප්‍රතිඵලයක් නෙවෙයි. බුද්ධි අංශවලට තොරතුරු ලැබුණා මීට පෙර වැලිකඩ හිරගෙදර සමයං කියලා හිටපු පසුගිය කාලෙ මරා දමන ලද අපරාධකාරයාගේ ගෝලයෙක් හිටියා චතුරංග කියලා. ඒ චතුරංග ඇතුළු කණ්ඩායමක් වැලිකඩ හිරගෙදර සරප් කියලා තියෙනවා යම්කිසි පෙත්තක්, ඒකට කියනවා රිවස් කියලාත්. ඒ පෙත්ත ගෙනල්ලා දවස් දෙකකදි හිරකරුවන් දෙදෙනා බැගින් දීලා බැලුවා.
ඒ පෙත්ත ගැහුවාම, කෙනෙකුගේ ලේ දකින්න ඕනා. මේ ගොල්ලො මේ අත්හදා බැලීම කරලා මේ ගොල්ලො ලෑස්ති වුණා වැලිකඩ හිරගෙදර ඒ පෙත්ත පුළුවන් තරම් බෙදාහැරලා මිනීමරණ තත්වයක් ඇති කරගන්න. මේක ඇත්තටම මෙහෙයවූයේ මත්ද්‍රව්‍ය ජාවාරමේ යෙදුණු නමුත් මේ වෙනකොට ඒක කරගන්න බැරුව ඉන්න බලවත් හිරකාරයො කණ්ඩායමක් තමයි මේ චතුරංග කියන කෙනාව මෙහයවූයේ ‘ වීරවංශ මහතා එසේ පැවසීය.
