අපවත්වී වදාල පූජ්‍ය ආචාර්ය වැලමිටියාවේ කුසලධම්ම හිමිගෙන් හිස්වූ කැළණිය විශ්ව විද්‍යාලයේ කුලපති ධූරයට කැළණිය රජමහා විහාරයේ විහාරාධිපති මහාචාර්ය කොල්ලුපිටියේ මහින්ද සංඝරක්ඛිත හිමි පත්කර තිබෙනවා.
ජනාධිපති ගෝඨාභය රාජපක්ෂ මහතා විසින් මෙම පත්කිරීම අද (05) දිනයේ සිදුකර ඇති බවයි වාර්තා වන්නේ.
කොල්ලුපිටියේ මහින්ද සංඝරක්ඛිත හිමි වඩාත් ජනප්‍රියත්වයට පත්වූයේ ඉකුත් ජනාධිපතිවරණ සමයේ කැළණි ගඟෙන් මතුවූවා යැයි කියන ධාතු සහිත නාගයෙක් සම්බන්ධ සිදුවූමක් හේතුවෙනි.
මණිඅක්ඛිත දිව්‍යරාජයා වෙනුවෙන් ගුප්ත විද්‍යා විශාරද උදාර මධුසංඛ නම් පුද්ගලයෙක් කැළණි විහාරයේ සිවුරු ගල නම් ස්ථානයේ නානුමුර පූජාවක් 2009 වසරේදී පවත්වා තිබෙනවා.
එහිදී උදාර මධුසංඛ නම් පුද්ගලයා පැවසුවේ මණිඅක්ඛිත නාරජුගේ ආරාධනයක් අනුව තමන් ගං පතුළට ගිය බවත් එහිදී නාගරාජයෙකු කටින් ගෙන ආ සරවඥ ධාතු සහිත කරඩුවක් තමන්ට ලබාදුන් බවත් පවසා සිටියා.
එය තහවුරු කරමින් කොල්ලුපිටියේ මහින්ද සංඝරක්ඛිත හිමි පවසා සිටියේ තමන්ට විශාල ශබ්දයක් ඇසුණු බවයි.
ගඟේ වතුරට තදයම් දෙයක් ස්පර්ශවන විට ඇතිවන ඝෝෂාවකින් අනතුරුව උදාර නම් පුද්ගලයා කරඩුවක් සහිතව කැළණි නදියෙන් ගොඩට ආ බවයි.
මෙම මිත්‍යාදුෂ්ටික අදහස වෙනුවෙන් කොල්ලුපිටියේ මහින්ද සංඝරක්ඛිත හිමි පෙනී සිටි අතර එයට දෙරණ මාධ්‍ය ජාලය පුළුල් ප්‍රචාරයක් ලබාදුන්නා.
