ශ්‍රී ලංකා පොදුජන පෙරමුණ අද (08) කළුතරදී හිටපු අග්‍රාමාත්‍ය මහින්ද රාජපක්ෂගේ ප්‍රධානත්වයෙන් විශේෂ ජන රැළියක් පවත්වා තිබෙනවා.
“එක්ව නැගිටිමු – කළුතරින් පටන්ගමු” මැයෙන් පැවති මෙම රැළිය සංවිධානය කර තිබුණේ හිටපු අමාත්‍ය රෝහිත අබේගුණවර්ධන විසින්.
රටේ උද්ගතවූ ජනතා අරගලය හමුවේ පසුගිය මැයි 09 වනදා අග්‍රාමාත්‍ය ධුරයෙන් ඉල්ලා අස්වීමෙන් අනතුරුව මහින්ද රාජපක්ෂ ප්‍රසිද්ධ දේශපාලන වේදිකාවකදී ජනතාව ඇමතීමට මෙසේ පැමිණියේ පළමු වරට‍යි.
එහිදී කෙටියෙන් ජනතාව අමතා අදහස් පළ කළ ඔහු මේ වනවිට අභියෝග රාශියකට තමන් මුහුණ දෙමින් සිටියත් ඒ අභියෝග සියල්ල ජයග්‍රහණය කිරීමට අවශ්‍ය ශක්තිය තමන් සතුව ඇති බව සඳහන් කර සිටියා.
අග්‍රාමාත්‍ය දිනේෂ් ගුණවර්ධන මහතා සහ රෝහිත අබේගුණවර්ධන, නාමල් රාජපක්ෂ, ජොන්ස්ටන් ප්‍රනාන්දු, සාගර කාරියවසම්, පියල් නිශාන්ත ඇතුළු ශ්‍රී ලංකා පොදුජන පෙරමුණේ මැති ඇමතිවරුන් රැසක් මෙම අවස්ථාවට එක්ව සිටියහ.
