ඉන්දියාවේ බෙංගාලයේ තීරණාත්මක අතුරු මැතිවරණයක් ජයග්රහණය කිරීම සඳහා මමාතා බැනර්ජිගේ මැතිවරණ ව්‍යාපාරයට ‘මැණිකේ මගේ හීතේ’ ගීතය යොදාගෙන ඇති බව NDTV වාර්තා කර සිටියි.
සමස්ත ඉන්දීය ත්‍රිණමූල් කොංග්‍රසයේ (ඒඅයිටීසී) සභාපතිනි මමාතා බැනර්ජි වෙනුවෙන් නිර්මාණය කරන ලද මෙම සංගීත වීඩියෝව ‘බැන්ග්ලෝර් ගොර්බෝ මාමාතා’ නම් කණ්ඩායමක් විසින් ෆේස්බුක් හි පළකර තිබුණි.
මෙය නිර්මානය කළ රාජේෂ් චක්‍රවර්ති, ඉන්දියා ටුඩේ පුවත්පත වෙත අදහස් දක්වමින් කියා සිටියේ, මමතා බැනර්ජි වෙනුවෙන් උපහාරයක් දැක්වීම සඳහා තමා මෙය නිර්මාණය කළ බවයි.
“මම පක්ෂ සාමාජිකයෙක් නොවේ. මම මමාතා බැනර්ජිගේ දේශපාලන ක්‍රියාකාරිත්වයේ රසිකයෙක් පමණයි” යනුවෙන් රාජේෂ් චක්‍රවර්ති පවසයි.
මැණිකේ මගේ හිතේ ගීතය භාවිතයෙන් මෙය නිපදවා ඇති අතර බෙංගාලි භාෂාවෙන් “හිතේ” යන්නෙන් අදහස් කරන්නේ සහාය දීම හෝ සහතික කිරීම යන්නයි.
මැණිකේ මගේ හිතේ ගීතයේ මුල් ගායනය 2020 දී සතිෂාන් රත්නායක න් සිදුකළ අතර මැයි මාසයේදී යොහානි දිලෝකා ද සිල්වාගේ නව ගායනයෙන් පසුව එය මෑතකදී ඉතා ජනප්‍රිය විය.
බටහිර බෙංගාල මහ ඇමතිනි බැනර්ජි හට, ඇයගේ තනතුරේ රැඳී සිටීමට නම් සැප්තැම්බර් 30 භබානිපෝර් අතුරු මැතිවරණයෙන් ජයග්රහණය කළ යුතුව පවතියි.
