මාරවිල මූලික රෝහල තුළ කොවිඩ් 19 වෛරසය පැතිර යාම හේතුවෙන් එම රෝහලේ කටයුතු දැඩි ලෙස අඩාල වී තිබෙනවා. මේ වනවිට එම රෝහලේ හදිසි අනතුරු වාට්ටු දෙකක්, ගැබිනි මව්වරුන්ගේ වාට්ටු දෙකක් සහ දැඩි සත්කාර ඒකකය තාවකාලිකව වසා දමා තිබෙනවා.
මාරවිල මූලික රෝහලේ දැඩි සත්කාර ඒකකයේ හෙද නිළධාරිනියන් දෙදෙනෙකුට වෛරසය ආසාදනය වී ඇති බව පළමුව තහවුරු කරගත් අතර අද උදෑසන වනවිට රෝහල් කාර්ය මණ්ඩලයේ තවත් 31 දෙනෙකුට වෛරසය ආසාදනය වී ඇති බව හඳුනාගෙන තිබේ. ඒ අතර වෛද්‍යවරුන් 08 දෙනෙකුද සිටින බවයි වාර්තා වන්නේ.
වසා දමා ඇති වාට්ටු නැවත ආරම්භ කර රෝහලේ කටයුතු කඩිනමින් යථා තත්ත්වයට පත් කිරීමට කටයුතු කරන බවයි පුත්තල දිස්ත්‍රික් සෞඛ්‍ය සේවා අධ්‍යක්ෂ දිනූෂා ප්‍රනාන්දු මහත්මිය පවසන්නේ.
