වෛද්‍ය පීඨ ශිෂ්‍ය ක්‍රියාකාරී කමිටුව විසින් ලයිසියම් සහ කොතලාවල ආයතන යොදා ගනිමින් නැවත පෞද්ගලික වෛද්‍ය විද්‍යාල බිහි කිරීමේ සැලැස්මක් ඇතැයි රාගම වෛද්‍ය පීඨ ශිෂ්‍ය සංගමය සභාපති ස්ටීව් සොලමන් පවසනවා.
ඔහු මේ බව පැවසුවේ වෛද්‍ය පීඨ සිසුන් සෞඛ්‍ය අමාත්‍යාංශය ඉදිරිපිට ඊට එරෙහිව විරෝධතාවයක නිරතව සිටිය දී යි.
නිදහස් අධ්‍යාපනය බිද වැට්ටවීමේ පියවරක් ලෙස නැවතත් පෞද්ගලික වෛද්‍ය පීඨ රට තුළ නිර්මාණය කිරීමේ සැලැස්මක් වර්තමාන ආණ්ඩුව විසින් ගෙන යන බවත් එවැනි පසුබිමක පෞද්ගලික වෛද්‍ය සිසුන් සදහා සුදුසු ශික්ෂණ රෝහල් සොයා බැලීමට ජනාධිපතිවරයා විසින් කමිටුවක් පත් කර ඇති බව රාගම වෛද්‍ය පීඨ ශිෂ්‍ය සංගමයේ සභාපති සඳහන් කරනවා.
මෙම කමිටුවට හා එම තීරණයට විරෝධතාවය පළ කරමින් වෛද්‍ය පීඨ ශිෂ්‍ය ක්‍රියාකාරී කමිටුව අද (20) දින සෞඛ්‍ය අමාත්‍යාංශය ඉදිරිපිට දී නිහඩ විරෝධතාවයක් පවත්වනු ලැබුවා.
රෝගී ජීවිත වෙන්දේසියේ යොදවමින් රෝහල් තුළම රෝගී ජීවිත අලෙවි කිරීමට හා ඒ මගින් නිදහස් සෞඛ්‍ය සේවයටද බලපෑමක් සිදු කරමින් ගෙන යාමට උත්සාහ කරන මේ වැඩපිළිවෙළ වහාම හකුලා ගත යුතු බවයි වෛද්‍ය පීඨ ශිෂ්‍ය ක්‍රියාකාරී කමිටුව අවධාරණය කර සිටින්නේ.
