කාර්මික විප්ලවයෙන් පසු පෘථිවියේ වායු උෂ්ණත්වය ඉහළ යමින් පවතින බව නාසා ආයතනය පවසනවා.
එහි ගොඩාර්ඩ් අභ්‍යවකාශ අධ්‍යයන ආයතනයේ දත්තවලට අනුව පසුගිය වසර නවය පෘථිවියේ උණුසුම්ම වසර කිහිපය බවට නිරීක්ෂණය වී තිබෙනවා.
මෙම වාර්තා නාසා ආයතනය විසින් සකස් කර ඇත්තේ පෘථිවියේ ඌෂ්ණත්වය ක්‍රමානුකූලව මැනීම කළ 1880 වසරේ සිට සටහන්වූ දත්තවලට අනුවයි.
බලශක්තිය ලබාගැනීමට පොසිල ඉන්ධන දහනය, ඇතැම් කෘෂිකාර්මික කටයුතු සදහා වනාන්තර විනාශ කිරීම සහ ගිනි තැබීම වැනි මානව ක්‍රියාකාරකම් ගෝලීය උෂ්ණත්වය ඉහළ යෑමට ප්‍රධාන හේතුව වී තිබෙන අතරම පෘථිවියේ උෂ්ණත්වය අවම වශයෙන් සෙල්සියස් අංශක 1.1 කින් වැඩිවී ඇති බව ඔවුන් පෙන්වා දෙනවා.
මේ අතර වරින් වර වැසි ඇද හැලුන ද දිවා කාලයේ පවතින අධික උණුසුම හේතුවෙන් මාස හයට අඩු බිළිඳුන් සිටින මව්වරුන් අවධානයෙන් කටයුතු කළ යුතු බවයි සෞඛ්‍ය අංශ පෙන්වා දෙන්නේ.
රිජ්වේ ආර්යා ළමා රෝහලේ විශේෂඥ වෛද්‍ය දීපාල් පෙරේරා ප්‍රකාශකර සිටියේ අධික උණුසුමත් සමඟ දරුවන් විජලනය වීම වළක්වාගැනීම සඳහා මාස 6 ට අඩු දරුවන්ට නිසි පරිදි මව්කිරි ලබාදිය යුතු බවයි.
එමෙන්ම මාස 6 ට වැඩි දරුවන්ට ලු‍ණු ස්වල්පයක් මිශ්‍ර කර දියර වර්ග ලබාදිය යුතු බවද ඔහු වැඩිදුරටත් සඳහන් කර සිටියා.
