සෞරග්‍රහ මණ්ඩලයේ කිලෝ මීටර් මිලියන ගණනක් ඈතින් පිහිටි ‘බෙන්නු’ නමැති ග්‍රහකයේ(asteroid bennu) මතුපිටින් පාෂාණ කොටස් රැගෙන ඒමට‘ඔසයිරස් රෙක්ස්’ (OSIRIS-Rex) නමැති රොබෝ ගවේෂණ යානය සමත්ව ඇති බව ඇමරිකාවේ නාසා ආයතනය නිවේදනය කරනවා.
වසර හතක් පුරාවට පැවතුණු මෙහෙයුමක් අවසන් කරමින් මෙම යානාව නැවතත් පෘථිවිය බලා පැමිණ තිබුණා.
සූරා එක් රැස් කරගත් ‘බෙන්නු’ ග්‍රහකයේ පස් සහ දූවිලි ‘ඔසයිරස් රෙක්ස්’ යානයට සම්බන්ධ කුඩා කැප්සියුලයක් තුළ තැන්පත් කර තිබූ බවයි වාර්තා වෙන්නේ.
අදාළ යානය මඟින් දූවිලි කොටස් ග්‍රෑම් 250ක් පමණ රැගෙන පැමිණ ඇති බවද සඳහන් වෙනවා.
ඒ අනුව රොබෝ යානය, ඊට ලබා දී තිබුණු උපදෙස් අනුගමනය කරමින් පෘථිවිය අසලට පැමිණ, එම කැප්සියුලය පෘථිවිය දෙසට මුදා හැර තිබුණා.
පෙරදී සැලසුම් කළ පරිදි එම දූවිලි කොටස් අන්තර්ගත කැප්සියුලය, ඇමෙරිකාවේ යූටා කාන්තාරයේ ස්ථානයකට පතිත කර තිබෙනවා.
‘ඔසයිරස් රෙක්ස්’ රොබෝ යානය 2016 වසරේදී මීටර් 500 ක් පළල ‘බෙන්නු’ ග්‍රාහකය බලා පිටත්ව ගොස් තිබුණා.
නාසා ආයතනය පෙන්වා දෙන්නේ ‘බෙන්නු’ ග්‍රහකය පෘථිවියට වඩා පැරැණි වන අතර එහි රහස් අනාවරණය කර ගැනීම, සෞරග්‍රහ මණ්ඩලයේ උපත සහ පරිණාමය පිළිබ‍ඳ අධ්‍යයනයට ඉතා වැදගත් වන බවයි.
