බුදු දහමට අපහාස වන අයුරින් ප්‍රකාශ සිදු කළ සිද්ධියට රක්ෂිත බන්ධනාගාර ගත කර සිටි ජයනි නතාෂා එදිරිසූරිය හට ආධාර අනුබල ලබාදුන් චෝදනාව මත රක්ෂිත බන්ධනාගාර ගත කර සිටි බෲනෝ දිවාකර යන අයට අද (21) කොටුව මහේස්ත්‍රාත් අධිකරණය විසින් ඇප නියම කළා.
ඒ රුපියල් ලක්ෂ 10 බැගින් වූ ශරීර ඇප දෙකක් සහ රුපියල් 50,000 ක මුදල් ඇපයක් මතයි.
කෙසේවෙතත් බෞද්ධ දර්ශනයට හා සංස්කෘතියට අපහාස වන අයුරින් ප්‍රකාශයක් සිදු කිරීමේ චෝදනාවට අත්අඩංගුවට ගත් සමාජ මාධ්‍ය ක්‍රියාකාරිනී නතාෂා එදිරිසූරිය ලබන මස 5 වනදා දක්වා රක්ෂිත බන්ධනාගාර ගත කර තිබෙනවා.
නටාෂා එදිරිසූරිය යන අය අද ඇප ඉල්ලීමක් ඉදිරිපත් කර තිබුණද කොටුව මහේස්ත්‍රාත් තිලිණ ගමගේ විසින් අදාළ ඇප ඉල්ලීම ප්‍රතික්ෂේප කර තිබුණා.
එමෙන්ම ආගමික සහජීවනයට බාධා වන අයුරින් ප්‍රකාශ නිකුත් කළ පූජ්‍ය රාජාංගනයේ සද්ධාරතන හිමියන් ද ලබන මස 5 වනදා දක්වා යළි රක්ෂිත බන්ධනාගාර ගත කිරීමටද කොටුව මහේස්ත්‍රාත් තිලිණ ගමගේ අද නියෝග කරනු ලැබුවා.
