ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂ මහතා නැවත වරක් පාර්ලිමේන්තුවට පැමිණෙන බවට තොරතුරු වාර්තා වනවා.
ඒ අනුව ශ්‍රී ලංකා පොදුජන පෙරමුණේ ජාතික ලැයිස්තු මන්ත්‍රී මහාචාර්ය රංජිත් බණ්ඩාර මහතා ඉල්ලා අස්වීමට නියමිතවන අතර එයින් පුරප්පාඩුවන මන්ත්‍රී ධූරය සඳහා බැසිල් රාජපක්ෂ මහතා එළැඹෙන 6 වනදා පාර්ලිමේන්තුවේදී දිවුරුම් දෙනු ඇති.
ඉන්අනතුරුව බැසිල් රාජපක්ෂ මහතා ජනාධිපතිවරයා ඉදිරියේ මුදල් කැබිනට් අමාත්‍ය ධූරයේ දිවුරුම් දීමට නියමිතයි.
මේ වන විට මුදල් අමාත්‍යවරයා ලෙස කටයුතු කරන්නේ අග්‍රාමාත්‍ය මහින්ද රාජපක්ෂ මහතා වන අතර ඔහුගෙන් මුදල් අමාත්‍යාංශය ඉවත් කළ පසුව අග්‍රාමාත්‍යවරයා හට ඉතිරිවන්නේ බුද්ධශාසන, ආගමික හා සංස්කෘතික කටයුතු අමාත්‍ය ධූරය සහ නාගරික සංවර්ධන හා නිවාස අමාත්‍ය ධූරයයි.
බැසිල් රාජපක්ෂ මහතා ඇමරිකානු පුරවැසිභාවය සහිත ද්විත්ව පුරවැසියෙක්වන අතර මීට පෙර පැවති ප්‍රතිපාදන අනුව ඔහුට පාර්ලිමේන්තු මන්ත්‍රීවරයෙක් ලෙස කටයුතු කිරීමට හැකියාවක් තිබුණේ නැහැ.
කෙසේ වෙතත් 19 වන ව්‍යාවස්ථා සංශෝධනය අහෝසි කරමින් 20 වන ව්‍යාවස්ථා සංශෝධනය රැගෙන ආ පසුව ද්විත්ව පුරවැසියන්ටද මෙරට පාර්ලිමේන්තුවේ මන්ත්‍රී ධූරයක් දැරීමේ ප්‍රතිපාදන තහවුරු කර තිබෙනවා.
ඒ අනුව මෙරට පළමු ද්විත්ව පුරවැසි මුදල් අමත්‍යවරයා ලෙස බැසිල් රාජපක්ෂ මහතා ඉතිහාසගතවනු ඇති.
