තාක්ෂණ අමාත්‍යාංශය ලෙස නව අමාත්‍යාංශයක් ගැසට් කර තිබෙනවා.
මීට පෙර තාක්ෂණ අමාත්‍යංශය තාක්ෂණ හා ආයෝජන ප්‍රවර්ධන අමාත්‍යාංශ ශීර්ෂය යටතට ඇතුළත් කර තිබූ අතර ව්‍යාපාරික ධම්මික පෙරේරා ආයෝජන ප්‍රවර්ධන අමාත්‍යංශයේ දිවුරුම් දීමත් සමග තාක්ෂණ අමාත්‍යාංශය වෙනම අමාත්‍යාංශයක් ලෙස ගැසට් කර තිබෙනවා.
තාක්ෂණ අමාත්‍යාංශය දැනට පවතින්නේ ජනාධිපති ගෝඨාභය රාජපක්ෂ යටතේ වන අතර ඊට විදුලි සංදේශ නියාමන කොමිසන් සමාගම, ටෙලිකොම් ආයතනය ඇතුළු තවත් ආයතන කිහිපයක් ඇතුළත් වනවා.
මේ අතර, ලබන මස 10 වනදා දක්වා අත්‍යවශ්‍ය සේවා සඳහා පමණක් ඉන්ධන නිකුත් කිරීමට රජය තීරණය කර ඇති බවත් පවතින තත්ත්වය හමුවේ අන්තර් පළාත් ගමනාගමන කටයුතු බොහෝ දුරට අත්හිටුවීමට සිදුවනු ඇති බවත් ප්‍රවාහන, මහාමාර්ග හා ජනමාධ්‍ය අමාත්‍ය ආචාර්ය බන්දුල ගුණවර්ධන පවසනවා.
එමෙන්ම එළඹෙන 10 වනදා දක්වා නගරාසන්න පාසල් වසා තැබෙන අතර ග්‍රාමීය පාසල් පවත්වාගෙන යාමේ හැකියාව පවතින බවද රජයේ ප්‍රවෘත්ති දෙපාර්තමේන්තුවේ ඊයේ පැවැති මාධ්‍ය හමුවකට එක්වෙමින් අමාත්‍යවරයා කියා සිටියා.
මේ අතර, ඉන්ධන හිඟයත් සමඟ සිය ගමනාගමනය සඳහා විකල්ප ක්‍රමවේදයන් ලෙස ජනතාව පාපැදියට යොමුව ඇති අතර යාපනය ප්‍රදේශයේ ජනතාව ප්‍රවාහන මාධ්‍යයක් ලෙස අශ්ව සහ ගොන් කරත්ත භාවිතයට යොමුව තිබෙනවා.
