කාශ්මීරයේ විශේෂ තත්ත්වය අහිමි කිරීම හෙවත් 370 ව්‍යවස්ථාව අහෝසි කිරීම අභියෝගයට ලක් කරමින් ගොනු කර ඇති පෙත්සම්වලට අදාලව මධ්‍යම ආණ්ඩුව කරුණු දැක්වීම ආරම්භ කරමින් ශ්‍රේෂ්ඨාධිකරණයට දැනුම් දුන්නේ පැරණි ජම්මු සහ කාශ්මීර් ප්‍රාන්තයට විශේෂ තත්ත්වය ලබා දුන් විධිවිධාන අවලංගු කිරීමේ “ව්‍යවස්ථාමය වංචාවක්” නොමැති බවය.
ඉන්දීය අගවිනිසුරු ඩී වයි චන්ද්‍රචුඩ් ප්‍රමුඛ පංච පුද්ගල ව්‍යවස්ථා විනිසුරු මඩුල්ල ප්‍රකාශ කළේ අවලංගු කිරීම සඳහා අනුගමනය කරන ක්‍රියා පටිපාටිය සාධාරණීකරණය කිරීමට සිදුවන බවයි.
370 ව්‍යවස්ථාව අවලංගු කිරීම වෙනුවෙන් පෙනී සිටින නීතිපති ආර් වෙන්කටරමණී 370 ව්‍යවස්ථාව අවලංගු කිරීම අවශ්‍ය බවත්, එම ක්‍රියාවලිය තුළ කිසිදු දුර්වලතාවයක් නොමැති බවත් ප්‍රකාශ කළේය.
සොලිසිටර් ජනරාල් තුෂාර් මේතා ද විනිසුරු මඩුල්ල හමුවේ කියා සිටියේ, ඉන්දියාවට අන්තර්ග්‍රහණය වූ එකම ප්‍රාන්තය ජම්මු සහ කාශ්මීරය නොවන බවයි.
1947 නිදහසෙන් පසු ඉන්දියාවට එක් වූ තවත් බොහෝ රාජ්‍යයන් කොන්දේසි සහිතව සහ ඔවුන් ඒකාබද්ධ වීමෙන් පසු ඔවුන්ගේ ස්වෛරීභාවය ඉන්දියාවේ ස්වෛරීභාවයට යටත් වූ බව සොලිසිටර් ජනරාල් පැවසීය.
2019 අගෝස්තු 5 වන දින මධ්‍යම රජය 370 වගන්තිය යටතේ ලබා දී ඇති ජම්මු සහ කාශ්මීරයේ විශේෂ තත්ත්වය අවලංගු කරන බව ප්‍රකාශයට පත් කර කලාපය යූනියන් ප්‍රදේශ දෙකකට බෙදා ඇත.
