යහපාලන ආණ්ඩුව සමයේ දූෂණ මර්දන කමිටුවෙන් වැටුප් ලබාගෙන ලේකම්වරයා ලෙස කටයුතු කළ පුද්ගලයා අද වනවිට පොලිස් භාර ඇමතිවරයා බවට පත්ව ඇති බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී නාමල් රාජපක්ෂ මහතා චෝදනා කරනවා.
ඔහු මේ බව සඳහන් කළේ, අත්අඩංගුවට පත් සිය සොහොයුරා යෝෂිත රාජපක්ෂගේ සුව දුක් විමසීමට CID පරිශ්‍රයට පැමිණි අවස්ථාවේදියි.
එහිදී ඔහු වැඩිදුරටත් සඳහන් කළේ,
“අද මල්ලි ආවා මට කලින්. එයාව බලලා යන්න ආවා. ඉතින් බොහොම හොඳයි පොලිසිය සෙනසුරාදා නිවාඩු දවසේ උදේම නැගිටලා නීතිපති උපදෙස් ක්‍රියාත්මක කරන්න කොළඹට ඇවිල්ලා, නැති හින්දා හයිවේ එකට යන පාරේ දිගේ ගිහින් තංගල්ලට ගිහිල්ලා බෙලිඅත්ත එක්සිට් එකේ නවත්තලා කට උත්තරයක් ලියාගෙන ජනතාවගේ බදු මුදල්වල වියදමෙන් පොලිසියේ වාහන කිහිපයක දාලා ආරක්ෂාවත් දීලා කොළඹ CIDයට ගෙනල්ලා දැන් කට උත්තර ලියනවා. ඉතින් පොලිසිය වැඩකරන්න ඕනේ ඒ විදිහට තමයි.
ඉතින් යහ පාලන ආණ්ඩුවේ දූෂණ මර්ධන කමිටුවෙන් පඩි අරගෙන ලේකම්වරයා විදිහට කටයුතු කරපු පුද්ගලයා අද පොලිස් භාර ඇමතිවරයා බවට පත් වෙලා තියෙනවා. දැන් අපි දැක්කා එතුමාට උපදේශකවරුත් වැඩි කරන් තියෙනවා ජනාධිපති ලේකම්තුමා හරහා, වාහනත් වැඩි කරගෙන තියෙනවා, එතුමාගේ තෙල් ප්‍රමාණයත් වැඩිකරගෙන තියෙනවා. ඉතින් දැන් යහපාලන ආණ්ඩුවේ ඉතුරු ටික ක්‍රියාත්මක වෙනවා.
පරණ ෆයිල් ටික හොයන එක පැහැදිලිවම හොඳයි, හොයන්න ඕනේ. ඒකනේ අද අපි හිනාවෙලා මේ තැනට මෙහෙම ඇවිල්ලා ඉන්නේ. ඉතින් අපේ අතේ කුණු නෑ, අපේ අතේ ලේ නෑ.”
