ඩීසල් මිල ඉහළයාම පිළිබඳව පමණක් අවධානය යොමු කරමින් බස් ගාස්තු සංශෝධනය කර ඇති බැවින් අන්තර් පළාත් බස්රථ සේවාවන් නවතා දැමීමට සිදුවන බව අන්තර් පළාත් පෞද්ගලික බස් හිමියන්ගේ සංගමය පවසනවා.
අන්තර් පළාත් පෞද්ගලික බස් හිමියන්ගේ සංගමයේ සභාපති සරත් විජිත කුමාර මහතා පවසන්නේ බස් ගාස්තුව 15% කින් පමණක් වැඩිකිරීම කිසිසේත්ම දුරගමන් සේවාවන් පවත්වාගෙන යෑම සදහා ප්‍රමාණවත් නොවන බවයි.
ටයර් සහ ටියුබ් මෙන්ම ලිහිසි තෙල් සහ වාහන සේවා ලබාගැනීමේ මිල 35% කින් ඉහළ ගොස් ඇති බව ඔහු පෙන්වා දෙනවා.
මේ නිසා ඩීසල් මිල පමණක් නොව අනෙකුත් නිර්ණායක ද සැලකිල්ලට ගනිමින් බස් ගාස්තු සංශෝධනය සැලකිල්ලට ගත යුතු බවයි විජිත කුමාර මහතා පවසන්නේ.
කෙසේ හෝ ඉන්ධන මිල පමණක් සලකා බලා බස් ගාස්තු සංශෝධනය ප්‍රකාශයට පත් කළහොත් වහාම ක්‍රියාත්මක වන පරිදි අන්තර් පළාත් සහ දුර ගමන් සේවා ක්‍රියාත්මක කිරීම නතර කිරීමට සංගමයට සිදුවනු ඇති බව ද විජිත කුමාර මහතා වැඩිදුරටත් පවසනවා.
