හැකිතරම් ගමන් බිමන් අඩුකර සෑමවිටම අන්තර්ජාලය හරහා අවශ්‍යතා ඉටුකර ගන්නා ලෙස අධ්‍යාපන අමාත්‍ය දිනේෂ් ගුණවර්ධන මහතා ජනතාවගෙන් ඉල්ලා සිටිනවා.
ඒ, පෙරේදා (12) දින මහරගම ප්‍රාදේශීය ලේකම් කාර්යාලයේ දී පැවති අභ්‍යාසලාභීන් ලෙස බඳවා ගත් උපාධිධාරීන්, රාජ්‍ය සේවයේ ස්ථිර කිරීමේ රජයේ වැඩසටහන යටතේ, මහරගම ප්‍රාදේශීය ලේකම් කොට්ඨාශයේ, උපාධිධාරීන්ට පත්වීමේ ලිපි ප්‍රදානය කිරීමේ උත්සවය අමතමින්.
ඉන්ධන අර්බුදයකට මුහුණදෙමින් සිටින නිසා එසේ අනවශ්‍ය ගමන් බිමන්වලින් වැළකී සිටින ලෙසත් ඉන්ධන භාවිතය හැකිතරම් අවම කිරීම හරහා ඩොලර් ඉන්ධන අර්බුදය මෙන්ම ඩොලර් අර්බුදයද විසඳා ගත හැකි බවත් අමාත්‍යවරයා පවසනවා
රට මුහුණ දී සිටින අර්බුද විසඳා ගැනීම සඳහා ජනතාවගේ සහාය ලැබිය යුතු බවයි අමාත්‍යවරයා පෙන්වා දෙන්නේ.
ශ්‍රී ලංකාව වැනි තෙල් නිෂ්පාදනය නොකරන ඕනෑම රටක් ඉන්ධන අර්බුදයට මුහුණ දිය හැකි බවත් එය ශ්‍රී ලංකාවට පමණක් විශේෂ ප්‍රශ්නයක් නොවන බවත් පෙන්වා දෙන අමාත්‍යවරයා වැඩිදුරටත් පවසන්නේ ගතහැකි හොඳම විසඳුම ඉන්ධන භාවිතය හැකිතරම් සීමා කිරීම බවයි.
ඒ හරහා රටින් පිටතට ගලා යන ඩොලර් ප්‍රමාණය අවම කරගත හැකි බවත් ඔහු අවධාරණය කර සිටිනවා.
