ගර්භනී කාන්තාවන් සඳහා චීනයේ සයිනොෆාම් එන්නත පමණක් ලබාදිය යුතු බවට සෞඛ්‍ය අමාත්‍යාංශය විසින් නිර්දේශ කර ඇතැයි සෞඛ්‍ය සේවා නියෝජ්‍ය අධ්‍යක්ෂ ජනරාල් වෛද්‍ය හේමන්ත හේරත් මහතා පවසයි.
වෙනත් එන්නත් පිළිබඳ ප්‍රමාණවත් දත්ත නොමැති බැවින් ගර්භනී මව්වරුන්ට සයිනෝෆාම් එන්නත පමණක් ලබා දීමට සෞඛ්‍ය අමාත්‍යාංශයේ බෝවන රෝග පිළිබඳ උපදේශන කමිටුව නිර්දේශ කර තිබේ.
සයිනොෆාම් එන්නත ලබා දීමේ දී අදාළ ප්‍රදේශවල ගර්භනී කාන්තාවන් සඳහා ප්‍රමුඛතාවය ලබා දෙන බව යුධහමුදාපති ශවේන්ද්‍ර සිල්වා ප්‍රකාශ කර ද එන්නත ලබා දීමේ දී මතුවන ප්‍රායෝගික ගැටලු විසඳා ගැනීමට යම් කාලයක් ගත වන බව සෞඛ්‍ය සේවා නියෝජ්‍ය අධ්‍යක්ෂ ජනරාල්වරයා සඳහන් කරයි.
“එය ඉතා සංකීර්ණ ක්‍රියාවලියක් බැවින් පවුල් සෞඛ්‍ය කාර්යාංශය තවමත් මාර්ගෝපදේශ සකස් කරමින් සිටිනවා” යැයි වෛද්‍ය හේරත් අවධාරණය කළේය.
ගර්භණී මව්වරුන්ට එන්නත් කිරීම තවමත් ආරම්භ කර නොමැති බවත්, අදාළ මාර්ගෝපදේශ සකස් කිරීමට යම් කාලයක් ගතවන බැවින් ඉන් පසුව පමණක් එන්නත ලබා දීම ආරම්භ කළ හැකි බවත් ඔහු පවසයි.
තවද, සමහර ගර්භනී මව්වරුන්ට සෞඛ්‍ය අමාත්‍යාංශයේ නිසි අනුමැතියකින් තොරව එන්නත් ලබා දී ඇති බවට වාර්තා කිහිපයක් ලැබී ඇති බව ද ඔහු පැවසීය.
