අතිශය ජනාකීර්ණ සහ රථ වාහන බහුල ප්‍රදේශයක් වන කොළඹ – හයිලෙවල් මාර්ගය අවහිර කරමින් මහජනයා අපහසුතාවය පත් කරන අන්දමින් මොටර් රථ තරඟයක් පැවැත්වීම සහ අපරික්ෂාකාරී ලෙස රිය ධාවනය කිරීම යන වරදවල් සමබන්ධයෙන් තරුණයින් පිරිසක් අත්අඩංගුවට ගැනීමට මේ වනවිට පොලිස් විමර්ශන ආරම්භ වී තිබෙනවා.
මෙම පිරිස සිංහල හින්දු අලුත් අවුරුද්දේ පුණ්‍ය කාලය තුළදී මෙම තරගය පවත්වා ඇති බවයි වාර්තා වෙන්නේ.
පසුගිය 13 වැනිදා රාත්‍රී 9ට පමණ මෙම සිදුවීම සිදුව ඇත්තේ හෝමාගම – ගලවිලවත්ත ප්‍රදේශයේ දියි.
මාර්ගයේ තවත් රථ වාහන ධාවනය වෙමින් පැවති පසුබිමක දී මෙම සැකකාර තරුණයින් එක්ව සිය මෝටර් රථ අධික වේගයෙන් අපරික්ෂාකාරී ලෙස ධාවනය කළ බවද වාර්තා වනවා.
පොලිස් මාධ්‍ය ප්‍රකාශකවරයා සඳහන් කර සිටියේ, තරඟය සංවිධානය කළ පිරිසට සහ මෙම තරඟයට සහභාගී වී සහයෝගය දැක්වූ සියල්ලන්ටම එරෙහිව නීතිය දැඩිව ක්‍රියාත්මක කරන බවයි.
