මෙරටට ගෙන්වා ඇති ප්‍රමිතියෙන් තොර සහල් තොගය ප්‍රතිඅපනයනය කිරීමට නියෝග කළ බව රේගු දෙපාර්තමේන්තුව පවසනවා.
එහි මාධ්‍ය ප්‍රකාශක සීවලී අරුක්ගොඩ මහතා සඳහන් කළේ, එය මෙරටට සහල් එවූ සමාගමේ වරදක් බව නිරීක්ෂණය වී ඇති බවයි.
ඒ අනුව එම සමාගමෙන් යළි මුදල් අය කර ගන්නා බවයි ඔහු සඳහන් කළේ.
කෙසේ වෙතත්, එම සහල් තොග ගෙන් වූ ආනයනකරු අසාදු ලේඛනගත කිරීමක් නොකරන බවද සීවලී අරුක්ගොඩ මහතා පවසනවා.
පෞද්ගලික ආනයනකරුවන් ගෙන් වූ කොළඹ වරායේ පැවති බහාලුම් 3ක තිබී ප්‍රමිතියෙන් තොර එම සහල් තොගය සොයා ගැනුණා.
ඒවායේ පැවති සහල් ප්‍රමාණය, කිලෝග්‍රෑම් 75,000 ක්.
එක් බහාලුමක තිබූ සහල් ඇසුරුම්වල නිෂ්පාදිත දිනය සහ කල් ඉකුත් වූ දිනයට උඩින් ස්ටිකරයක් අළවා එම දින වෙනස් කර තිබෙනවා.
සෞඛ්‍ය අමාත්‍යාංශයේ ආහාර පාලන ඒකකය සඳහන් කළේ, අනෙක් බහාලුම් දෙකේ තිබූ සහල්වල කෘමි සතුන් නිරීක්ෂණය වූ බවයි.
මේ වනවිට මෙරටට ආනයනය කළ සහල් තොග, මෙට්‍රික්ටොන් 6500කට ආසන්න ප්‍රමාණයක් බෙදා හැර ඇති බව රේගු මාධ්‍ය ප්‍රකාශකවරයා සඳහන් කළා.
