පාර්ලිමේන්තු සේවකයන්ගේ දීමනාව සියයට 70 සිට සියයට 31ක් දක්වා කප්පාදු කිරීම සම්බන්ධයෙන් විරෝධය පළ කරමින් එහි සියලුම සේවක සංගම් කතානායක වෛද්‍ය ජගත් වික්‍රමරත්න මහතාට පැමිණිලි කර තිබෙනවා
මෙම පැමිණිල්ල කතානායකවරයා විසින් ජනාධිපතිවරයාට යොමු කෙරෙනු ඇති
රැස්වීම් පැවැත්වෙන දිනවල සේවයට නොපැමිණෙන්නේ නම් රැස්වීම් දීමනාවෙන් මෙතෙක් කලක් කප්පාදු කරන ලද සියයට දෙකේ අගය නව වැටුප් චක්‍රලේඛයෙන් සියයට පහ දක්වා වැඩි කර ඇති බවත් එයද පාර්ලිමේන්තු කාර්ය මණ්ඩලයට කරන ලද බලවත් අසාධාරණයක් බවත් එම සේවක සංගම් නියෝජිතයින් පෙන්වා දී තිබුණා.
එම අගය පෙර පැවති සියයට දෙකේ ප්‍රතිශතයේ රඳවා තැබීමට කටයුතු කරන ලෙසද ඔවුන් ඉල්ලා සිටිනවා.
එසේම අනෙකුත් රාජ්‍ය ආයතනවල ඉහළ වැටුප් තලවල නිලධාරීන්ට නව වැටුප් වැඩිවීමෙන් හිමිවන වැටුප පාර්ලිමේන්තුවේ අදාළ සමාන තනතුරු දරන නිලධාරීන්ට හිමි නොවන බවත් එමඟින්ද ඔවුනට අසාධාරණයක් සිදුව ඇති බවත් මෙම නියෝජිතයෝ පෙන්වා දෙනවා.
පාර්ලිමේන්තු සේවක සංගමයේ සභාපති ඒ එච්.එල්.ඒ.එස් ජයවර්ධන සහ ලේකම් ආර් ඒ එම් එන් රණසිංහ, පාර්ලිමේන්තු පරිපාලන කාර්ය මණ්ඩලීය සංගමයේ සභාපති පී.ජී.පී ප්‍රියංකර සහ ලේකම් බුද්ධිකා අබේසිංහ, පාර්ලිමේන්තු කතා පරිවර්තක සංගමයේ සභාපති අජිත් කුමාර් සහ ලේකම් ලාල් කුමාරසිරි යන මහත්වරුන්ගේ අත්සනින් යුතුව මෙම ලිපිය බාරදී තිබෙන බවයි පැවසෙන්නේ.
