උඩරට වතුකරය ආශ්‍රිත ප්‍රදේශවල මත්පැන් අලෙවිය සියයට හතලිහකින් පමණ පහත බැස ඇතැයි උඩරට මත්පැන්හල් හිමියන් පවසනවා.
මේ හේතුවෙන් උඩරට මත්පැන්හල්වලට ගෙන එනු ලබන මත්පැන් වර්ග වැඩි දින ගණනක් මත්පැන්හල්වල ගබඩා කොට තබා තිබෙන බවත්, බියර් අලෙවියද ඉතා සීඝ්‍ර ලෙස පහත බැස තිබෙන බව ඔවුන් සඳහන් කරනවා.
උඩරට වතුකරයේ වතු කම්කරුවන් හා අනෙකුත් පිරිස් දැඩි ආර්ථික දුෂ්කරතාවයන්ට මුහුණ පා සිටින කාලයක මත්පැන් වර්ගවල මිල ගණන් ඉහළයාම, අලෙවිය අඩුවීමට ප්‍රධානතම හේතුවක් ලෙසයි මත්පැන්හල් හිමියන් පෙන්වා දෙන්නේ.
උඩරට වතුකරය ආශ්‍රිත ප්‍රදේශවල මත්පැන් අලෙවිය මීට ඉහත දී ඉහළ මට්ටමක පැවැති බවත්, මේ හේතුවෙන් මත්පැන්හල් වල ආදායම් මට්ටමද දිනෙන් දින පහත බසිමින් පවතින බව සඳහන්.
මෙසේ බියර් අළෙවිය ද පහත බැසීම හේතුවෙන් ඇතැම් මත්පැන්හල්වල බියර් බෝතල් කල් ඉකුත්වීමේ ප්‍රවණතාවයක් ද මතුව තිබෙනවා.
කල් ඉකුත් වු බියර් බෝතල් හා ටින් නැවත ඒවා ලබා දෙන ආයතනවලට හරවා යැවීමට සිදුව ඇති බවද මත්පැන්හල් හිමියන් සඳහන් කරනවා.
