මඟීන් සිටින අවස්ථාවේ දී අධික වේගයෙන් අවදානම් සහගත ලෙස ධාවනයේ යෙදුණු පෞද්ගලික බස් රථ දෙකක් පොලිස් අත්අඩංගුවට ගෙන තිබෙනවා.
කොළඹ සිට හැටන් දක්වා සහ මහනුවර සිට හැටන් දක්වා ධාවනය කළ පෞද්ගලික බස් රථ දෙක ගිනිහත්හෙන සිට හැටන් දක්වා අධික වේගයෙන් තරඟකාරී ලෙස බස් රථ ධාවනය කිරීම සම්බන්ධයෙන් එම බස් රථවල ගමන් ගත් මඟීන් හැටන් පොලීසිය දුරකථන ඇමතුමක් ලබාදී ඇති බව සඳහන්.
බස් රථ දෙක අන්තරාදායක ලෙස ධාවනය කරන අයුරු එම බස් රථ දෙක පිටුපසින් ආ පෞද්ගලික වාහනයකින් පැමිණි පුද්ගලයෙකු විසින් ජංගම දුරකථනයකින් වීඩියෝ ගත කර තිබෙනවා.
අදාළ දර්ශන හැටන් පොලිස් පරීක්ෂක රංජිත් ජයසේන මහතා යොමු කිරීමෙන් අනතුරුව හැටන් පොලිස් ස්ථානයේ රථ වාහන අංශයේ නිලධාරීන් විසින් බස් රථ නවතා රියදුරන් දෙදෙනා අත්අඩංගුවට ගෙන ඇති බවයි වාර්තා වන්නේ.
එහිදී ඔවුන්ට මෝටර් රථ ආඥා පනතට පටහැනිව බස් රථයේ සවිකර තිබු උපාංග රැසක් ගැලවීමට උපදෙස් ලබාදී ඇති බව සඳහන්.
ඊට අමතරව දින 10ක් ඇතුළත එම උපාංග ගලවා ඉවත් කරන තෙක් බස් රථ දෙකෙහි ආදායම් බලපත්‍රය ප්‍රධාන මෝටර් රථ පරීක්ෂකවරයා භාරයට ගෙන තිබෙනවා.
අවධානම් සහිතව අධික වේගයෙන් බස් රථ ධාවනය කිරීම සම්බන්ධයෙන් බස් රථ රියදුරන්ට හෙට (23) හැටන් මහේස්ත්‍රාත් අධිකරණය හමුවේ පෙනී සිටින උපදෙස් ලබාදී ඇප මත නිදහස් කර ඇති බවයි වාර්තා වන්නේ.
