හිරු TV ප්‍රවෘත්ති මගින් විකාශය වූ ප්‍රවෘත්තියක් සහ එම ආයතනයේ මාධ්‍යවේදී චමුදිත සමරවික්‍රම විසින් තමන්ට මරණ තර්ජන ඇතැයි බවට කරන ලද පැමිණිල්ලක් සම්බන්ධයෙන් විමර්ශනය කිරීමට පොලිසිය පියවර ගෙන තිබෙනවා.
ඒ අනුව පසුගිය 26 වනදා හිරු රූපවාහිනි නාලිකාවේ ප්‍රවෘත්ති මගින් විකාශය කෙරුණු ගල්කිස්ස ගණිකා ජාවාරම සම්බන්ධයෙන් වූ සිදුවීමට පොලීසිය කිසිදු ක්‍රියාමාර්ගයක් නොගත් බවට වන පුවත අසත්‍ය බවයි පොලීසිය සදහන් කරන්නේ.
එම පුවතේ සදහන් වූයේ අදාළ ගණිකාවන් තවත් කිහිප දෙනෙකු සමග එක්වී එහි එන පුද්ගලයන්ට පහරදී කොල්ලකෑම පිළිබදව ප්‍රදේශවාසීන් විසින් පොලීසිය දැනුවත් කලද තවමත් එම ස්ථානයේ එම ජාවාරම ක්‍රියාත්මක වන බවයි.
කෙසේ වෙතත් එම සිදුවීම පිළිබදව මේ වන විටත් පරීක්ෂණයක් ක්‍රියාත්මක වෙමින් පවතින බව පොලීසිය සදහන් කරනවා.
එමෙන්ම මාධ්‍යවේදී චමුදිත සමරවික්‍රම මහතා තමන්ට මරණ තර්ජන එල්ල වූ බවට පසුගියදා පොලීසියට කරන ලද පැමිණිල්ලේ කිසිදු පදනමක් නොමැති බව මූලික විමර්ශනවලින් හෙළි වී ඇතැයි පොලිසිය පවසනවා.
ඒ අනුව මෙම සිදුවීම් දෙක සම්බන්ධයෙන් පුළුල් පරීක්ෂණයක් ආරම්භ කිරීමට පොලිසිය තීරණය කර තිබෙනවා.
ඊට අදාළ විමර්ශන සිදුකිරීමට ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතාට භාරදුන් බවයි වාර්තා වන්නේ.
