විරෝධතා මර්දනය කිරීමේ දී පුරවැසියන්ගේ මානව හිමිකම් කඩවීම් සම්බන්ධයෙන් ශ්‍රී ලංකාවේ නීතිය ක්‍රියාත්මක කරන බලධාරින් වගකිව යුතු බව ඇම්නෙස්ටි ඉන්ටර්නැෂනල් ආයතනය (Amnesty International) ඉදිරිපත් කර ඇති නවතම වාර්තාවකින් අනාවරණය කරනවා.
Sri Lanka: ‘Ready to suppress any protest’ යන නමින් නිකුත් කර ඇති මෙම වාර්තාවෙන් 2022 මාර්තු සහ 2023 ජූනි අතර ශ්‍රී ලංකාවේ සිදු වූ විරෝධතා 30 කට අදාළ පොලිස් මෙහෙයුම්වල දී නීති විරෝධී ආයුධ භාවිතය යටතේ ගැනෙන බලය යෙදවීම සම්බන්ධයෙන් විශ්ලේෂණය කර තිබෙනවා
එම වාර්තාව සඳහන් කරන්නේ, මෙරට නීතිය ක්‍රියාත්මක කිරීමේ බලධාරීන් විසින් නීතිවිරෝධී ලෙස කඳුළු ගෑස් සහ ජල ප්‍රහාර සහ බැටන් පොලු අවභාවිත කිරීම්, අවම වශයෙන් විරෝධතා 17 කදී සිදුවූ සිදුවීම් ඇසුරෙන් වීඩියෝ සාක්ෂි සහිතව හඳුනාගෙන තිබෙන බවයි.
“ආරම්භයේ සිට ම, ශ්‍රී ලංකා පොලිසිය 2022-23 විරෝධතා මැඩ පැවැත්වීම සඳහා ප්‍රවේශ වී ඇත්තේ ඒවා නීති විරෝධී සහ ප්‍රචණ්ඩකාරී වනු ඇති බවත් ඒවා මර්දනය කිරීමට බලය යෙදවිය යුතු බවත් උපකල්පනය කරමින්. සාමකාමීව විරෝධතා දැක්වීමට ජනතාවට අයිතියක් ඇති බවත්, විරෝධතා සඳහා පහසුකම් සැලසීමට සහ ආරක්ෂා කිරීමට බලධාරීන්ට යුතුකමක් ඇති බවත් හඳුනා ගැනීමට පොලිසිය අසමත් වී තිබෙනවා. ඒ වෙනුවට, ඔවුන් බොහෝ දුරට සාමකාමී විරෝධතාකරුවන් ඉලක්ක කර, ලුහුබැඳ ගොස් පහර දී තිබෙනවා” යනුවෙන් එම වාර්තාවේ සඳහන් කර තිබෙනවා.
කොළඹ, බත්තරමුල්ල, කැලණිය, යාපනය සහ ගාල්ල යන ප්‍රදේශවල පැවති විරෝධතා 30ක සමාජ මාධ්‍යවල සංසරණය වූ සත්‍යාපිත වීඩියෝ 95ක් පිළිබඳ සම්මුඛ පරීක්ෂණ 39ක් සහ විවෘත මූලාශ්‍ර විමර්ශනයක් සිදු කරමින් ඇම්නෙස්ටි ඉන්ටර්නැෂනල් සිය වාර්තාව සකසා තිබෙනවා.
ඉකුත් මාර්තු මාසයේ දී ඇම්නෙස්ටි ඉන්ටර්නැෂනල් ආයතනය ශ්‍රී ලංකා පොලිසියට ලිපියක් යවමින් මෙම වාර්තාවේ ඇති චෝදනා ගෙනහැර දක්වමින් නිල ප්‍රතිචාරයක් ඉල්ලා සිටිය ද ප්‍රකාශනය නිකුත්කරන අවස්ථාව වනවිටත් ඊට පිළිතුරක් ලැබී නොතිබුණු බවයි එම ආයතනය සඳහන් කරනවා.
