ලොව පුරා සිටින ඉස්ලාම් බැතිමතුන්ගේ හජ් උත්සවය අදට (21) යෙදී තිබේ.
මෙහිදී මුස්ලිම් ජනතාව එකමුතුභාවයටත් ,පරිත්‍යාගශීලීත්වයටත් මුල්තැන දෙනවා.
මෙරට හජ් වන්දනා සැමරුම් කොවිඩ් -19 මාර්ගෝපදේශවලට යටත්ව සිදුකරන බවයි කොළඹ මහා පල්ලිය සඳහන් කරන්නේ. සීමිත පිරිසගේ සහභාගිත්වයෙන් යාච්ඤා කටයුතු සිදුකරන ලෙස උපදෙස් ලබා දී ඇති බව එහි ප්‍රධාන මවුලවි මොහොමඩ් තස්ලින් පවසනවා.
මේ අතර, සියලුදෙනාගේ ආරක්ෂාව සහ සමාජ සුභ සිද්ධිය පිණිස කොවිඩ් වසංගතය හේතුවෙන් පනවා ඇති සීමාවන් කෙරෙහි විශේෂ අවදානය යොමුකර ඉස්ලාම් සමය වතාවත්වල නිරත වන ලෙස ජනාධිපති ගෝඨාභය රාජපක්ෂ මහතා ඉස්ලාමීය බැතිමතුන්ගෙන් ඉල්ලා සිටිනවා.
එමෙන්ම, ඉස්ලාමීය මඟපෙන්වීම් ද නිසි අයුරින් අනුගමනය කරමින් ලෝකවාසී ජනතාවම කෙටි කලක් ඇතුළත කොවිඩ් වසංගතයෙන් මුදා දෙන්නැයි අද වැනි උතුම් දිනෙක අල්ලාහ් දෙවියන්ගෙන් අයැදිය හැකි බවයි නිවේදනයක් නිකුත් කරමින් අග්‍රාමාත්‍ය මහින්ද රාජපක්ෂ මහතා ඉස්ලාමීය බැතිමතුන්ට සිහිපත් කර සිටින්නේ.
මේ අතර, මෙවර හජ් උත්සවය වෙනුවෙන් සතුන් ඝාතනය සඳහා කිසිදු මුස්ලිම් දේවස්ථාන පරිශ්‍රයක අවසර ලබා නොදීමට මුස්ලිම් ආගමික සහ සංස්කෘතික කටයුතු දෙපාර්තමේන්තුව සහ වකුෆ් සභාව තීරණය කර තිබෙනවා.
