වර්තමාන අගමැතිවරයා සහ කැබිනට් මණ්ඩලය ඉල්ලා අස්වූ පසුව පාර්ලිමේන්තුව නියෝජනය කරන සියලු පක්ෂවල නියෝජනයෙන් සර්ව පාක්ෂික ආණ්ඩුවක් පිහිටුවීමට තමන් එකඟ බව ජනාධිපති ගෝඨාභය රාජපක්ෂ පවසනවා.
ඒ, ආණ්ඩු පක්ෂය නියෝජනය කළ පක්ෂ නායකයින් වෙත මේ පිළිබඳව ලිපියක් මගින් දැනුම් දෙමින්.
ඒ අනුව එම කාරණය පිළිබඳව සාකච්ඡා කිරීම සඳහා අප්‍රේල් 29 වනදා පෙරවරු 10.30ට ජනාධිපති මන්දිරයට පැමිණෙන ලෙසයි ඔහු සිය ලිපියෙන් දන්වා ඇත්තේ.
දැනට ආණ්ඩු පක්ෂය නියෝජනය කරන පක්ෂ නායකයින්, 2020 මහ මැතිවරණයෙන් පසු පාර්ලිමේන්තුවේ ආණ්ඩු පක්ෂය නියෝජනය කළ හා මේ වනවිට ස්වාධීන කණ්ඩායම් වශයෙන් කටයුතු කරන පක්ෂ නායකයින් වෙත ජනාධිපතිවරයා විසින් එම ආරාධනය සිදුකර ඇත.
අතිපූජ්‍ය ත්‍රෛනිකායික මහානායක ස්වාමීන්වහන්සේලා මෙන්ම අතිඋතුම් කාදිනල් හිමියන් ඇතුළු සර්ව ආගමික නායකයින් ද දේශපාලන පක්ෂ හා පොදුජන සංවිධාන රාශියක් විසින් ද සිදුකළ ඉල්ලීම් සලකා බැලීමෙන් පසු ජනාධිපතිවරයා විසින් එම තීරණය ගෙන ඇති බවයි පැවසෙන්නේ.
ඒ අනුව වර්තමාන අග්‍රාමාත්‍යවරයා ඇතුළු කැබිනට් මණ්ඩලය ඉල්ලා අස්වීමෙන් අනතුරුව පිහිටුවීමට යෝජිත එකී සර්වපාක්ෂික ආණ්ඩුවේ ව්‍යුහය, ක්‍රියාත්මක වියයුතු කාල සීමාව, එහි වගකීම් ලබාදෙන පුද්ගලයින් කවුරුන්ද යන්න සම්බන්ධයෙන් සාකච්ඡා කොට තීරණය කළ යුතු බව ද ජනාධිපතිවරයා විසින් දැනුම්දී තිබෙනවා.
