දැනට ලැබී ඇති සහ ඉදිරි දින කිහිපය තුළ ලැබීමට නියමිත ඉන්ධන තොග ක්‍රමවත්ව දිවයින පුරා ඉන්ධනහල් වෙත බෙදාහැරීමට පියවර ගන්නා ලෙස ජනාධිපති ගෝඨාභය රාජපක්ෂ මහතා උපදෙස් ලබාදී තිබෙනවා
පෙට්‍රල්, ඩීසල්, ගෑස් බෙදාහැරීම සහ ආනයනය සම්බන්ධයෙන් අද (17) පෙරවරුවේ කොළඹ, කොටුව ජනාධිපති මන්දිරයේ පැවති විශේෂ සාකච්ඡාවේදී ජනාධිපතිවරයා පවසා ඇත්තේ ලංකා ගමනාගමන මණ්ඩලයට අයත් පිරවුම්හල් යොදාගනිමින් පෞද්ගලික හා සංචාරක බස්රථ සහ පාසැල් වෑන් රථවලට පොලීසියේ අධීක්ෂණය යටතේ ඉන්ධන නිකුත්කිරීමට කටයුතු කළ යුතු බවයි.
අනෙකුත් අත්‍යවශ්‍ය සේවා සඳහා හඳුනාගත් ඉන්ධන පිරවුම්හල් වෙතින් අඛණ්ඩව ඉන්ධන නිකුත් කිරීමටත්, පිරවුම්හල් වෙත යුද හමුදාවේ සහ පොලීස් විශේෂ කාර්ය බලකායේ ආරක්ෂාව සැපයීමටත් මෙම සාකච්ඡාවේදී තිරණය වූ බව ජනාධිපති මාධ්‍ය අංශය නිකුත් කළ නිවේදනයේ සඳහන්.
අනවශ්‍ය ලෙස ඉන්ධන තොග රැස්කරන්නන්ට එරෙහිව දැඩිව නීතිය ක්‍රියාත්මක කරන ලෙසටද ජනාධිපතිවරයා මෙහිදී නියෝග කර තිබෙනවා.
එමෙන්ම පවතින ගෑස් තොග ක්‍රමානුකූලව බෙදාහැරීමටත් ප්‍රමාණවත් ගෑස් තොග කඩිනමින් ඇණවුම් කිරීමටත් මෙහිදී සාකච්ඡා වූ බව ජනාධිපති මාධ්‍ය අංශය පවසනවා.
