අරගලකරුවන් විසින් කොළඹ, කොටුවේ පිහිටි ජනාධිපති මන්දිරය අත්පත් කරගත් අවස්ථාවේදී එවක ජනාධිපති ගෝඨාභය රාජපක්ෂගේ කාමරයේ තිබී සොයා ගත් රුපියල් මිලියන 17.8 කට අධික මුදලක් අරගලකරුවන් විසින් පොලිසියට භාරදීමේ සිද්ධියේදී සාපරාදී විශ්වාසය කඩ කිරීමට ආධාර අනුබල දුන්නේ යැයි චෝදනා කරමින් එවක බස්නාහිර පළාත භාර ජේෂ්ඨ නියෝජ්‍ය පොලිස්පති දේශබන්දු තෙන්නකෝන්ට එරෙහිව කොටුව මහේස්ත්‍රාත් අධිකරණය හමුවේ ගොනු කළ පෞද්ගලික පැමිණිල්ලක් බල රහිත කරමින් අභියාචනාධිකරණය විසින් දුන් තීන්දුව අහෝසි කරන ලෙස ඉල්ලා ගොනු කෙරුණු අභියාචනා පෙත්සමක් විභාගයට ගැනීමට ශ්‍රේෂ්ඨාධිකරණය අද (18) අවසර ලබා දුන්නා.
ඉකුත් වසරේ වත්මන් පාර්ලිමේන්තු මන්ත්‍රී මහින්ද ජයසිංහ විසින් ගොනුකර තිබූ අභියාචනා පෙත්සමක් සලකා බැලීමෙන් අනතුරුව ප්‍රීති පද්මන් සූරසේන, ශිරාන් ගුණරත්න සහ මහින්ද සමයවර්ධන යන අයගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල විසින් මෙම නියෝගය නිකුත් කළා.
ඉන් අනතුරුව අදාල පෙත්සම ජුනි මස 12 වනදා විභාගයට ගැනීමටත් දින නියම කළා.
පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ රියෙන්සි අර්සකුලරත්න අධිකරණය හමුවේ කරුණු දක්වමින් 2022 වසරේ ජූලි මස 09 වනදා කොටුව, ජනාධිපති මන්දිරය වැටලූ අරගලකරුවන් විසින් එවක ජනාධිපති ගෝඨාභය රාජපක්ෂගේ කාමරයේ තිබී සොයා ගත් රුපියල් මිලියන 17.8 කට අධික මුදලක් කොටුව පොලිසිය වෙත භාර දුන් බව සඳහන් කළා.
ඉන් අනතුරුව කොටුව පොලිසියේ ස්ථානාධිපතිවරයාට දුරකථනයෙන් කථා කළ එවක බස්නාහිර පළාත භාර ජේෂ්ඨ නියෝජ්‍ය පොලිස්පති දේශබන්දු තෙන්නකෝන් එම මුදල් අමාත්‍ය ටිරාන් අලස්ට භාරදෙන ලෙස දැනුම් දුන් බව සඳහන් කළ ජනාධිපති නීතිඥවරයා ඒ පිළිබඳව කොටුව පොලිසියේ ස්ථානාධිපතිවරයා සටහන් යොදා තිබෙන බවත් කියා සිටියා.
පොලිසිය භාරයට ගනු ලැබූ එම මුදල් අධිකරණයට ඉදිරිපත් නොකොට ටිරාන් අලස් අමාත්‍යවරයාට භාර දෙන ලෙස දැනුම් දීම තුළින් දේශබන්දු තෙන්නකෝන් සාපරාධී විශ්වාසය කඩකිරීමකට ආධාර අනුබල දීම නමැති වරද සිදුකර ඇති බවත් ජනාධිපති නීතිඥවරයා සඳහන් කළා.
ඉන් අනතුරුව සාපරාධී විශ්වාසය කඩකිරීමට ආධාර අනුබලදීම සම්බන්ධයෙන් තම සේවාදායකයා දේශබන්දු තෙන්නකෝන් සැකකරුවකු ලෙස නම් කරමින් පුද්ගලික පැමිණිල්ලක් ඉදිරිපත් කළ අතර එම පැමිණිල්ල සලකා බැලූ කොටුව මහේස්ත්‍රාත් අධිකරණය එහි සැකකරුට සිතාසි නිකුත් කළ බවත් ජනාධිපති නීතිඥවරයා කියා සිටියා.
ඊට එරෙහිව දේශබන්දු තෙන්නකෝන් අභියාචනාධිකරණයට පෙත්සමක් ඉදිරිපත් කළ අතර ඒ අනුව අදාල පුද්ගලික පැමිණිල්ල බල රහිත කරමින් අභියාචනාධිකරණය විසින් තීන්දුවක් ලබා දී තිබෙන බවත් ජනාධිපති නීතිඥවරයා පෙන්වා දුන්නා.
අභියාචනාධිකරණයේ එම තීන්දුව සම්පූර්ණයෙන්ම නීතියට පටහැනි වන අතර එය අහෝසි කරන ලෙස ඉල්ලා මෙම අභියාචනා පෙත්සම ඉදිරිපත් කළ බවත් ජනාධිපති නීතීඥ රියන්සි අර්සකුලරත්න සඳහන් කළා.
ඉන් අනතුරුව වග උත්තරකාර දේශබන්දු තෙන්නකෝන් වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා අධිකරණය හමුවේ කරුණු දක්වමින් මෙම සිද්ධිය හරහා අපරාධමය වරදක් උද්ගත නොවන බව සඳහන් කළා.
පොලිසිය විසින් භාරගත් අදාල මුදල් මහජන ආරක්ෂක අමාත්‍යවරයා වෙත භාර දෙන ලෙස දැනුම් දීම තුළින් අපරාධමය වරදක් උද්ගත වන්නේ කෙසේදැයි ප්‍රශ්න කළ ජනාධිපති නීතිඥවරයා අදාල මුදල් ඉන් අනතුරුව අධිකරණයට ඉදිරිපත් කර තිබෙන බවත් පැවසුවා.
ඒ අනුව අභියාචනයක් ඉදිරිපත් කිරීමට අවසර ඉල්ලා ගොනුකර තිබෙන මෙම පෙත්සම පවත්වාගෙන යාමට හැකියාවක් නොමැති බවත් ජනාධිපති නීතිඥ රොමේෂ් ද සිල්වා වැඩිදුරත් සදහන් කළා.
දෙපාර්ශවය විසින් ඉදිරිපත් කළ කරුණු සලකා බැලීමෙන් අනතුරුව ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල මෙම නියෝගය නිකුත් කළා.
