රුහුණු-කතරගම දේවාලයේ කපු සහයකවරයෙකුට ඊයේ (30) සවස එම දේවාලයේම කපු මහතෙකු ලෙස කටයුතු කරන තවත් පුද්ගලයෙකු විසින් පහර දී තිබෙනවා.
පහර දීමෙන් තුවාල ලැබූ කපු සහයකවරයා කතරගම රෝහලට ඇතුළත් කර ඇති අතර මේ වන විට ඔහු එම රෝහලේ ප්‍රතිකාර ලබනවා.
News 19 අප කළ විමසීමකදී පහර කෑමට ලක් වූ කපු සහයකවරයා වන උපුල් රත්නායක මහතා පවසා සිටියේ ඊයේ සවස 6.00ට පමණ කතරගම දේවාල පරිශ්‍රයේදී තවත් කපු මහත්මයෙකු විසින් තමාට පහර දුන් බවයි.
දේවාලයට පැමිණි තමාගේ හිතවත් නීතීඥවරයෙකුට නිසි ලෙස නොසැලකූ බවට චෝදනා කරමින් ගයාන් අරාපක්ෂ නමැති එම දේවාලයේම කපු මහත්මයෙක් මෙම පහර දීම සිදු කළ බව උපුල් රත්නායක මහතා පවසා සිටියා.
ඔහු තවදුරටත් සඳහන් කළේ මෙම පුද්ගලයා දේවාලයේ බැතිමතුන් ඉදීරියේදී ඔහුගේ මුහුණට, සහ පපු ප්‍රදේශයට ම්ලේච්ඡ අන්දමින් පහරදුන් බවයි.
මෙම පුද්ගයා මීට කාලයකට පෙර දේවාලයේම සේවය කරන තවත් තරුණයෙකුට පහර දී ඇති බවත් ඔහුට ඇති බිය නිසාවෙන් මේ සම්බන්ධයෙන් පැමිණිල්ලක් ඉදිරිපත් කර නොමැති බවත් උපුල් රත්නායක මහතා පවසා සිටියා.
බැතිමතුන් විශාල පිරිසක් ගැවසෙන පූජා භූමියක මෙවැනි හැසිරීම් හෙළා දකින බවත් මෙම පහරදීම සම්බන්ධයෙන් සාධාරණ පරීක්ෂණයක් සිදු කරන ලෙස බලාධාරීන්ගෙන් ඉල්ලා සිටින බවත් ඒ මහතා වැඩිදුරටත් සඳහන් කළා.
