එක්සත් ජාතික පක්ෂයේ මහ ලේකම්, පාලිත රංගේ බණ්ඩාර මහතා වහාම ක්‍රියාත්මක වන පරිදි එම ධුරයෙන් ඉවත් කිරීමට නායක ජනාධිපති රනිල් වික්‍රමසිංහ මහතා විසින් තීරණය කර ඇතැයි විශ්වාස කටයුතු ආරංචි මාර්ගවලින් වාර්තා වනවා.
ඔහු සම්බන්ධයෙන් ලැබී තිබෙන බරපතල කාරණා කිහිපයක් සැලකිල්ලට ගනිමින් මෙවැනි තීරණයකට එළඹ තිබෙන බව පැවසෙනවා.
එක්සත් ජාතික පක්ෂයේ ව්‍යවස්ථාව අනුව පක්ෂයේ ලේකම්වරයා පත්කිරීමේ හා අවශ්‍ය ඕනෑම මොහොතක ඉවත් කිරීමේ බලය පක්ෂයේ නායකයා සතු වනවා.
කෙසේ නමුත් වාර්තා වන අන්දමට පසුගිය දින කිහිපයේ ඔහු ‘සිරිකොත’ එක්සත් ජාතික පක්ෂයේ මුලස්ථානයේ රාජකාරි කටයුතු සඳහාද පැමිණ තිබුණේ නැහැ.
ඒ අනුව, එක්සත් ජාතික පක්ෂයේ මහ ලේකම් පාලිත රංගේ බණ්ඩාර හැර සෙසු නිලධාරීන් වෙත මැතිවරණ මෙහෙයුම් වගකීම් බාරදීමට එක්සත් ජාතික පක්ෂයේ නායකයා රනිල් වික්‍රමසිංහ මහතා විසින් ඊයේ (28) කටයුතු කළ බවට වාර්තා වනවා.
නියෝජ්‍ය මහ ලේකම් ක්‍රිශාන්ත තියඩෝර්, සිරිකොත ප්‍රධාන විධායක අධ්‍යක්ෂ ශමල් සෙනරත්, මැතිවරණ මෙහෙයුම් ප්‍රධානී ජනාධිපති නීතිඥ රෝනල්ඩ් පෙරේරා ඇතුළු පිරිසට ‘සිරිකොත’ පක්ෂ මූලස්ථානයේ රැඳී සිටිමින් සියලු දිස්ත්‍රික්ක වල සම්බන්ධීකරණ කටයුතු කරන ලෙස රනිල් වික්‍රමසිංහ මහතා විසින් උපදෙස් ලබා දී තිබෙන බව පැවසෙනවා.
