ජපානයේ නිල සංචාරයක නිරත ජනාධිපති රනිල් වික්‍රමසිංහ ජපාන අධිරාජ්‍යයා වන නරුහීටො හමුවී ඇති බව වාර්තා වනවා.
ටෝකියෝ නුවරදී එම හමුව සිදුවූ බවයි ජනාධිපති මාධ්‍ය අංශය පවසන්නේ.
මීට පෙර ජනාධිපතිවරයා ජපානයේ අග්‍රාමාත්‍ය ෆුමියෝ කිශිඩා සමග ද්වීපාර්ශ්වික සාකච්ඡා සිදු කරනු ලැබුවා.
එමෙන්ම, රනිල් ඔහුගේ ජපාන සංචාරය අවසන් කරමින් අද පිලිපීනය බලා පිටත්ව යාමට නියමිත වනවා. ඒ, එරටදී ආරම්භ වන ආසියානු සංවර්ධන බැංකුවේ අධිපතිවරුන්ගේ සමුළුවට සහභාගිවීම සඳහායි. මෙවර සමුළුවේ මුලසුන ශ්‍රී ලංකාවට හිමිව තිබෙනවා.
පිලිපීනයේ රැඳී සිටින කාලය අතරතුර රනිල් වික්‍රමසිංහ මහතා ආසියානු සංවර්ධන බැංකුවේ සභාපතිවරයා හමුවීමට නියමිත අතර ඉන් අනතුරුව පිලිපීන ජනාධිපතිවරයාද හමුවීමට නියමිතයි.
ණය ප්‍රතිව්‍යූහගත කිරීම සම්බන්ධයෙන් මේ දිනවල ශ්‍රී ලංකාව ණයහිමි රටවල් සහ සංවිධාන සමග සාකච්ඡා පවත්වමින් සිටින අතර මේ නිසා ජනාධිපතිවරයාගේ පිලිපීන සංචාරය අතිශය තීරණාත්මක වනු ඇත.
