රත්නපුර, කහවත්ත රෝහලේ අක්ෂි වෛද්‍යවරයා විදේශගත වීම හේතුවෙන් ප්‍රතිකාර සඳහා පැමිණෙන රෝගීන් විශාල පිරිසක් අසරණ තත්වයකට පත්ව තිබෙනවා.
කහවත්ත, ගොඩකවෙල, ඕපනායක, පැල්මඩුල්ල, බලංගොඩ, වැලිගෙපොළ යන ප්‍රාදේශීය ලේකම් කොට්ඨාස තුළ ජීවත් වන රෝගීන් මෙසේ අසරණ වී ඇති බවයි වාර්තා වෙන්නේ.
රෝහල් ආරංචි මාර්ග සඳහන් කළේ මෙම රෝහලේ දී සතියට දින හයක් අක්ෂි සායන පත්වන අතර, දිනකට සැත්කම් 150ත් 200ත් අතර ප්‍රමාණයක්ද සිදු කරන බවයි.
එහෙත් මෙම රෝහලේ සිටි අක්ෂි විශේෂඥ වෛද්‍යවරයා පසුගිය මස විදේශගත වීම නිසා අක්ෂි රෝගීන් දැඩි අසරණභාවයට පත්ව සිටින අතර, මෙම රෝහලට අක්ෂි විශේෂඥ වෛද්‍යවරයකු ලබාදෙන ලෙස එම රෝගීන් අදාළ බලධාරීන්ගෙන් ඉල්ලා සිටිනවා.
