දැනට රිමාන්ඩ් බන්ධනාගාරගතව සිටින සමගි ජනබලවේගයේ පාර්ලිමේන්තු මන්ත්‍රී රිෂාඩ් බදියුදීන් මහතාට එරෙහිව තිබූ විල්පත්තු අභය භූමිය ආසන්නයේ පිහිටා ඇති කල්ලාරු රක්ෂිතය එළිපෙහෙළි කර ජනාවාස ඇතිකිරීමේ නඩුවේ තීන්දුව අද ප්‍රකාශයට පත්කළා.
ඒ නිශ්ශංක බන්දුල කරුණාරත්න සහ ජනක් ද සිල්වා යන අභියාචනාධිකරණ විනිසුරුවන් ඉදිරියේ නඩුව විභාගයට ගත් අවස්ථාවේදීයි.
ඒ අනුව පාර්ලිමේන්තු මන්ත්‍රී රිෂාඩ් බදියුදීන්ගේ මෙහෙයවීමෙන් උතුරේ අවතැන් වූ ජනතාව නැවත පදිංචි කිරීම සඳහා කල්ලාරු ප්‍රදේශයේ අක්කර සිය ගණනක් එළිපෙහෙළි කරමින් ජනාවාස ඉදිකිරීම නීතිවිරෝධී බවයි අභියාචනාධිකරණය තීන්දු කළේ.
එලෙස එළිකළ ප්‍රදේශයේ නැවත වන වගාවක් සිදුකල යුතු බවටත් එය රිෂාඩ් බදියුදීන් මන්ත්‍රීවරයාගේ පෞද්ගලික වියදමින් සිදුකලයුතු බවටත් තීන්දුවේ සදහන්.
මෙහිදී වනසංරක්ෂණ දෙපාර්තමේන්තුවේ ක්‍රියාකලාපයද විනිසුරුවන්ගේ දෝෂදර්ෂණයට ලක්වුණා.
එමෙන්ම පෙත්සම්කාර පරිසර යුක්ති කේන්ද්‍රයට නැවත නඩුගාස්තු ගෙවන ලෙසට බදියුදීන් මන්ත්‍රීවරයා ඇතුළු වගඋත්තරකරුවන්ට උසාවිය නියෝග කළා.
