චීනයේ ෂැන්හයි නුවර පැවැත්වෙන ජාත්‍යන්තර මැණික් ප්‍රදර්ශනයට ව්‍යාපාරිකයන් සහභාගී කරවීම සඳහා මැණික් හා ස්වර්ණාභරණ අධිකාරිය විසින් එම ප්‍රදර්ශන කුටි වෙනුවෙන් තැන්පත් කරන ලද ඩොලර් 35,000ක මුදල ව්‍යාපාරිකයන් සහභාගී නොවීම හේතුවෙන් රටට අහිමි වීමේ අවදානමක් ඇති බව දිවයින පුවත්පත වාර්තා කරනවා.
නොවැම්බර් මස 05 සිට නොවැම්බර් 10වනදා දක්වා පැවැත්වෙන මෙම ප්‍රදර්ශනයට ව්‍යාපාරිකයන් 24 දෙනෙකු වෙනුවෙන් කුටි 12ක් වෙන් කිරීම සඳහා මෙම මුදල අධිකාරිය විසින් තැන්පත් කර ඇත. කෙසේ නමුත් දින 21ක කාලයක නිරෝධායන කාලයක් ගත කළ යුතු බවට චීනය විසින් නියමයක් පැනවීමෙන් පසුව එම ගමන සඳහා ඔවුන් සහභාගී වීමට අකමැත්ත පලකර ඇත.
මෙම නියමය සම්බන්ධයෙන් තමන්ට පූර්ව දැනුම්දීමක් නොකළ බවත් ඒ හේතුවෙන් අයෙකුට ලක්ෂ 8ක පමණ අමතර වියදමක්ද දැරීමට සිදුවන බවත් ඔවුන් විසින් පෙන්වා දී ඇත.
මේ වන විට ව්‍යාපාරිකයන් 20 දෙනෙකු සිය අකමැත්ත ප්‍රකාශ කර ඇති බවත් එසේ අකමැත්ත ප්‍රකාශ නොකළ ව්‍යාපාරිකයන් පවා කුටි සඳහා මුදල් ගෙවා නොමැති බවත් විශාල මුදලක් වැයකර සහභාගී වූවත් එහි ප්‍රතිඵලයක් තිබේද නැද්ද යන්න පවා අවිනිශ්චිත බවත් ව්‍යාපාරිකයෙක් පැවසූ බව පුවත්පත වාර්තා කර සිටිනවා.
මැණික් අපනයනයේදී අයකළ බදු මුදල මෑතකදී අඩකින් අඩු කිරීම නිසා අධිකාරියට විශාල බදු මුදලක් අහිමිව ඇති මොහොතක ත්වත් ඩොලර් 35,000ක් අහිමිවීමේ අවදානමක් මතුව ඇති බවත් එම මුදල ලබා ගැනීමට අධිකාරිය උත්සහ ගනිමින් සිටින බවත් දිවයින වාර්තා කර සිටිනවා.
