යුක්‍රේන සංචාරකයන් ගැන මාධ්‍යයට තොරතුරු දුන් සෆාරි රියදුරන් ඉවතට

මෙරටට පළමුව පැමිණි යුක්රේන ජාතික සංචාරකයන් පිරිස යාල වන උද්‍යානයේ සංචාරයට ගෙන ගොස් දින 14 ක් නිරෝධායනයට යැවීම හා එම ගමනේ අඩුපාඩු සම්බන්ධයෙන් මාධ්‍යයට අදහස් දැක්වූ සෆාරි රියදුරන් තිදෙනා නැවත යුක්රේන සංචාරකයන් යාල සංචාර සදහා ගිය අවස්ථාවේ සෆාරි ගමන් වලින් ඉවත් කර ඇත.
යාල වනෝද්‍යානයේ සංචාරය සදහා යුක්රේන සංචාරකයන් 65 දෙනෙකු අද (20) පැමිණ ඇති අතර පළමු සංචාරයට එක්ව මාධ්‍යයට කරුණු දැක්වූ සෆාරි රියදුරන් ඊට සම්බන්ධ කර නොගන්නා ලෙස දේශපාලන අධිකාරියෙන් දැනුම් දී ඇතැයි සෆාරි රියදුරන්ගේ සංගමයේ ප්‍රකාශකයෙක් සදහන් කළේය.
ඒ අනුව පෙර සංචාරයට එක්වූ රියදුරන් තිදෙනෙකු මෙම සංචාරයෙන් ඉවත් කර තිබේ. පළමු සංචාරයෙන් පසු යුක්රේන ජාතිකයන් ගෙන ගිය ජිප් රථ රියදුරන් දින 14 ක කාලයක් නිරෝධායනයට යොමු කිරීම නිසා එහි රියදුරන් කිහිප දෙනෙකු තමන්ට වූ අසාධාරණය සමාජ මාධ්‍ය හරහා මෙන්ම විද්‍යුත් හා මුද්‍රිත මාධ්‍ය හරහා ද ප්‍රකාශ කරන ලදි.
එම නිසා මීට පෙර සංචාරයට එක්වූ සෆාරි රථ රියදුරන් 28 දෙනාගෙන් තිදෙනෙකු මෙවර සංචාරයෙන් ඉවත් කර තිබේ.
මේ දිනවල සංචාරකයන් යාලට ගෙන එන්නේ ආණ්ඩුවේ මැදිහත්වීමෙන් බැවින් ඔවුන්ට කැමැති කණ්ඩායමක් තෝරාගත හැකි බව සෆාරි රියදුරෝ පවසති.
තමන් කළ සාධාරණ විවේචනය හේතුවෙන් යුද හමුදාව මේ කටයුතු සදහා මැදිහත්ව ඇති බවත් සියලු රියදුරන්ට ආරක්ෂිත ඇදුම් ලැබී ඇති බවත් රියදුරෝ කියා සිටිති.
ආණ්ඩුවේ ප්‍රාදේශීය සභා මන්ත්‍රීවරයෙකු මෙම කටයුතු සම්බන්ධීකරණය කරන බව පැවසූ මෙම රියදුරන්, ඔහුගේ මැදිහත්වීමෙන් මෙම රියදුරන් තිදෙනා කැපී ගොස් ඇතැයි ද සදහන් කරන ලදි.
නිරෝධායනය වූ කාලය තුළ තම නිවැසියන්ට විධිමත්ව ආහාර හෝ ලැබී නැතැයිද මෙම රියදුරෝ පවසති. වාහන ලීසිං ඇතුළු ගෙවීම් ඇති නිසා මෙවැනි අසාධාරණ ක්‍රියා නොකරන ලෙසද ඔවුහු බලධාරීන්ගෙන් ඉල්ලා සිටිති.