මෙවර මහමැතිවරණයේ තමා සමගි ජනබලවේගයේ නාමයෝජනා ලැයිස්තුවෙන් ඉවත් කර තිබෙන බව ආණමඩුව සම ආසන සංවිධායක ප්‍රේමසිරි මහතා විසින් චෝදනා කරනවා.
ඔහු පවසන්නේ අවසන් මොහොත වනතෙක් තිබු තමාගේ නම පක්ෂයෙන් ඉවත් කර තිබෙන බවත් තමා මැතිවරණයෙන් ඉවත් නොවු බවත්ය.
මැතිවරණවලට බයේ පැන නොයන බව පැවසු ප්‍රේමසිරි මහතා පක්ෂයට දින කිහිපකට පෙර පැමිණි අය සඳහාද අවස්ථා ලබා දි තිබෙන බව පැවසුවා.
මහ මැතිවරණය සඳහා ආණමඩුවෙන් තරඟකිරිමට හලාවත හා පුත්තලමේ පදිංචි දෙදෙනෙක්ද ඉදිරිපත් කර තිබෙන බව තවදුරටත් අදහස් දක්වමින් ඔහු සඳහන් කළා.
මෙවර ජනාධිපතිවරණයේදි සජිත් ප්‍රේමදාස මහතාට ඡන්ද 34000ක් ආණමඩුව ආසනයෙන් ලබා දුන් බවත් මේ වන විට එම ඡන්ද රැක ගැනිමේ අභියෝගයට ඔවුන් මුහුණ දි සිටින බවත් පවසා සිටියා.
තමාට මෙන්ම වෙන්නප්පුව ආසන සංවිධායක හිටපු අමාත්‍ය නිරෝෂන් පෙරේරා මහතාට නාමයෝජනා ලබා නොදිම පිළිබඳ ජනතාව අතර කසුකුසුවක් පවතින බවද මෙහිදී ප්‍රේමසිරි මහතා පැවසුවා
තමා ඡන්දයට ඉදිරිපත් නොවිම සම්බන්ධයෙන් ජනතාව දැනුවත් කිරිමට පැවැත්වු ප්‍රවෘත්ති සාකච්ඡාවට එක්වෙමින් ප්‍රේමසිරි මහතා මෙම අදහස් අද (13) පළ කර සිටියා.
